ភ្នំពេញ ៖ អ្នកចាត់ការទូទៅ របស់ផលិតកម្មថោន លោក មាស សុខរតនៈ បានចេញមុខការពារ ចំពោះបទចម្រៀង ដែលកំពុងប្រឈមនឹងការរិះគន់ យ៉ាងធ្ងន់ធ្ងរពីមហាជន និងមន្ត្រី ជាន់ខ្ពស់មួយចំនួន បន្ទាប់ពីស៊ីឌី នៃបទចម្រៀងទាំងនោះ បានដាក់លក់តាមទីផ្សារ និងមានការគាំទ្រយ៉ាងខ្លាំង ។
សូមបញ្ជាក់ថា បទចម្រៀង ៤ វ៉ុល សម្រាប់ចូលឆ្នាំខ្មែរ របស់ផលិតកម្មថោន បានរងនូវការរិះគន់ជាបន្តបន្ទាប់ ពីមហាជន រួមទាំងមន្ត្រីរាជរដ្ឋាភិបាល ទៅលើពាក្យពេចន៍ នៃបទចម្រៀងទាំងនោះ ។ ទាក់ទងបទចម្រៀងខាងលើនេះដែរ លោក ស៊ិន ច័ន្ទសាយ៉ា ប្រធាននាយកដ្ឋានភាពយន្ត នៃក្រសួងវប្បធម៌ និងវិចិត្រសិល្បៈ ដែលទទួលបន្ទុកត្រួតពិនិត្យ បានមានប្រសាសន៍ថា ក្រុមលោកកំពុងតែត្រួតពិនិត្យ បទចម្រៀងរបស់ផលិតកម្មថោន ដែលកំពុងរងការរិះគន់ ។ ប៉ុន្តែលោកមិនទទួលខុសត្រូវ ចំពោះការដាក់លក់ស៊ីឌី នៃបទចម្រៀងទាំងនោះ លើទីផ្សារនោះទេ ព្រោះក្រសួងមិនទាន់មានការអនុញ្ញាតនៅឡើយ ។
ឆ្លើយតបនឹងការលើកឡើងខាងលើ លោក មាស សុខរតនៈ បានបញ្ជាក់ប្រាប់គេហទំព័រ និង សារពត៌មានក្នុងស្រុកថាជាធម្មតា ស៊ីឌី មិនចាំបាច់ឆ្លងកាត់ការត្រួតពិនិត្យ ពីក្រសួងវប្បធម៌នោះទេ ទាល់តែថតជាខារ៉ាអូខេ ទើបដាក់ឆ្លង និងរង់ចាំការអនុញ្ញាតពីក្រសួងវប្បធម៌។ដូច្នេះ លោកគិតថា ការដាក់លក់ស៊ីឌី នៅលើទីផ្សារ វាមិនអីនោះទេ ។
លោកបានបន្ថែមថា ក្រុមហ៊ុនលោក មិនចាប់អារម្មណ៍ព័ត៌មាន ចចាមអារ៉ាមថា មាន ការរិះគន់លើបទចម្រៀង របស់ផលិតកម្មលោកនោះទេ ព្រោះបទចម្រៀងទាំងអស់ នោះ កំពុងទទួលបានការគាំទ្រយ៉ាងខ្លាំង ។
លោក មាស សុខរតនៈ បានបញ្ជាក់ថា ពាក្យពេចន៍ក្នុងបទចម្រៀង របស់ផលិតកម្មថោនទាំង ៤ វ៉ុល សម្រាប់ចូលឆ្នាំខ្មែរនេះ សម្រាប់ពាក្យពេចន៍ដូចជា មិនមានបញ្ហានោះទេ សម្រាប់ន័យចំ ប៉ុន្តែបើយើងគន្លាស់ពាក្យ គឺមានបញ្ហាមែន ។ ប៉ុន្តែយ៉ាងណាក៏ដោយ លោករង់ចាំទទួលការរិះគន់ ពីមហាជនគ្រប់ស្រទាប់ រួមទាំងក្រសួងពាក់ព័ន្ធផងដែរ សំខាន់ក្រសួងវប្បធម៌ និងវិចិត្រសិល្បៈ ដែលជាម៉ែជាឪ ។
លោកបានបញ្ជាក់ចុងក្រោយថា លោកគ្មានបំណង យកវប្បធម៌សិល្បៈ មកលេងសើចនោះទេ ប៉ុន្តែអ្វីដែលជាមោទនភាព សម្រាប់ផលិតកម្មថោននោះ គឺបទចម្រៀងប្រមាណពី ៧០ ភាគរយ ទៅ ៨០ ភាគរយ គឺយើងធ្វើដោយខ្លួនឯង មិនចម្លងពីបរទេសនោះទេ ។ លោកក៏សូមសម្តែងនូវការអរគុណផងដែរ ចំពោះអ្នកគាំទ្រយ៉ាងច្រើន ដែលបានជាវស៊ីឌី បទចម្រៀងទាំង ៤ វ៉ុល សម្រាប់ចូលឆ្នាំខ្មែរ របស់ផលិតកម្មថោន ៕
