ប្រធានសហភាពសហជីពកម្ពុជា លោក រ៉ុង ឈុន ប្រាប់ VOD នៅព្រឹកថ្ងៃទី២៤ ខែកុម្ភៈនេះថា ក្រុមលោកបានចែកអស់ ប្រមាណ៩០ភាគរយ នៃខិតប័ណ្ណជាងមួយម៉ឺនសន្លឹក ហើយត្រូវបញ្ចប់នៅរសៀលនេះ។ លោកមានសង្ឃឹមថា ក្រុមកម្មករ កម្មការិនី ក៏ដូចជាសាធារណៈជន នឹងចូលរួមធ្វើកូដកម្មទូទាំងប្រទេស ។
សហជីព និងសមាគមចំនួន១៨ នឹងធ្វើកូដកម្មទូទាំងប្រទេស ចាប់ផ្តើមពីថ្ងៃទី១២ ខែមីនា ឆ្នាំ២០១៤ ក្នុងបំណងទាមទារឲ្យរដ្ឋាភិបាល និងនិយោជកដោះស្រាយបញ្ហាចំនួន៧ចំណុច ក្នុងនោះ សុំឲ្យដោះលែងអ្នកទាំង២១នាក់ និងសុំដំឡើងប្រាក់ឈ្នួលអប្បបរមា១៦០ដុល្លារដល់កម្មករ។ ប៉ុន្តែមេដឹកនាំ សហភាពសហព័ន្ធសហជីពជាតិកម្ពុជា លោក ជួន មុំថុល ដែលជាទីប្រឹក្សារដ្ឋាភិបាល ផងនោះបានប្រកាសប្រឆាំងនឹងការធ្វើកូដកម្មនេះ ។
ទោះជាយ៉ាងណា លោក អាត់ ធន់ ប្រធានសហជីព ស៊ីខាវឌូ ឲ្យដឹងទៀតថា នៅពេលដែលក្រុមការងារលោកចុះចែកខិតប័ណ្ណនេះ បានកត់សម្គាល់ឃើញថា កម្មករគាំទ្រកូដកម្មទាមទារប្រាក់ឈ្មួល ១៦០ដុល្លារ និងឲ្យដោះលែងមនុស្ស ២១នាក់នោះ ប៉ុន្តែមិនគាំទ្រ ការហាមចូលរួមកូដកម្មនោះទេ ។
លោក អាត់ ធន់ បានឲ្យដឹងថា សម្រាប់ក្រុមរបស់លោកវិញចែកបានជាង ៧០ភាគរយ នៃខិតប័ណ្ណជាងពីរម៉ឺនសន្លឹក។ លោកបន្តថា បើទោះជាមានការតាមឃ្លាំមើលពីសមត្ថកិច្ច ចំពោះការចែកខិតប័ណ្ណក្នុងរយៈពេលប៉ុន្មានថ្ងៃនេះក៏ដោយ ប៉ុន្តែអាចដំណើរការទៅបានតាមការគ្រោងទុក ។
ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា លោក ស មូរ៉ា មានប្រសាសន៍ថា យុទ្ធនាការទាមទារឲ្យដោះលែងអ្នកជាប់ឃុំទាំង ២១នាក់ និងការទាមទារប្រាក់ឈ្នួល១៦០ដុល្លារ នៅតែបន្តទៅមុខមិនដកថយទេ បើទោះជាប្រឈមនឹងការបង្ក្រាបក៏ដោយ។
កម្មករក្នុងវិស័យកាត់ដេរនៅប្រទេសកម្ពុជាមានជាង ៦សែននាក់ ដែលរដ្ឋាភិបាលបានកំណត់ប្រាក់ឈ្នួលពួកគេ ១០០ដុល្លារ ប៉ុន្តែកន្លងមកកម្មកររាប់ម៉ឺននាក់ បានផ្ទុំបាតុកម្ម មិនទទួលយកការដំឡើងប្រាក់ឈ្នួលនេះទេ ដោយទាមទារដល់១៦០ដុល្លារ ទើបធានាបានលើការចំណាយប្រចាំខែ៕
ប្រភពដោយ : (VOD) អត្ថបទដោយ : ជន ស្រីណុច
