តុលាការ ធម្មនុញ្ញរាជាណាចក្រថៃ នៅថ្ងៃពុធនេះទុកពេល ឲ្យលោកស្រី យីងឡាក់ នាយករដ្ឋមន្ត្រីចាំផ្ទះ មានពេលវេលា ១៥ថ្ងៃទៀត ដើម្បីមក ការពារខ្លួនផ្ទាល់ ករណីលោកស្រី ដកហូត តំណែងប្រធានក្រុមប្រឹក្សាសន្តិសុខជាតិថៃ ដែលរំលោភរដ្ឋធម្មនុញ្ញ។តាមគម្រោងលោកស្រី យីងឡាក់ នឹងឡើងទៅការពារក្ដី នៅថ្ងៃសុក្រសប្ដាហ៍មុននេះ ប៉ុន្តែលោកស្រី បានបញ្ចូនក្រុមមេធាវី ដើម្បីដាក់ឯកសារសារណាការពារក្ដី ហើយស្នើសុំពន្យារការឡើងបំភ្លឺ ដោយសារតែលោកស្រី ជាប់រង្វល់ហើយត្រូវពេលវេលាថែមទៀត ក្នុងការរៀបចំឯកសារពាក់ព័ន្ធ។
យោងតាម មាត្រា៦៨ នៃរដ្ឋធម្មនុញ្ញ ប្រសិនបើរកកំហុសឃើញ គឺលោកស្រី យីងឡាក់ អាចប្រឈមទោសដោយដកហូតអំណាច ហើយហាមធ្វើនយោបាយ រយៈពេល៥ឆ្នាំពីបទបំពានអំណាចរដ្ឋ។
សូមជម្រាបថា លោកស្រីយីងឡាក់ មិនត្រឹមតែរងការចោទករណីនេះទេ គឺនៅមានមួយករណីទៀត ដែលលោកស្រី នឹងត្រូវចោទ គឺករណីរឿងអាស្រូវពុករលួយ នៃគម្រោងទិញអង្ករ៕
ប្រភព ដោយ ៖ VOD
