Manny Pacquiao សងសឹក​ជាមួយ​ Timothy Bradley នៅ​ថ្ងៃ​អាទិត្យ វេលា​ម៉ោង​៨​ព្រឹក​​

Manny Pacquiao (ស្តាំ)សងសឹក​ជាមួយ​Timothy Bradley

កីឡាករ​ប្រដាល់​ជើង​ខ្លាំង​សញ្ជាតិ​ហ្វីលីពីន លោក Manny Pacquiao នឹង​វាយ​សងសឹក​ជាមួយ​កីឡាករ​ស្បែក​ខ្មៅ Timothy Bradley នៅ​ថ្ងៃ​អាទិត្យ ទី​១៣​ខែ​មេសា វេលា​ម៉ោង​៨​ព្រឹក ​(​ម៉ោង​នៅ​កម្ពុជា​)​។​

​សារព័ត៌មាន​ Wall Street Journal ចុះផ្សាយ​ថា លោក Pacquiao បានចាប់ផ្ដើម​ការហឹ្វកហាត់ ​របស់ខ្លួ​ន​ហើយ នៅ​ទីក្រុង Los Angeles ដើម្បី​ត្រៀម​ការប្រកួត​ ជាមួយ​កីឡាករ​សញ្ជាតិ​អាមេរិក Timothy Bradley នៅ​ថ្ងៃ​សៅរ៍ ទី​១២​ខែ​មេសា វេលា​ម៉ោង​៩​យប់​ (​ម៉ោង​នៅ​សហរដ្ឋអាមេរិក​)​។

Pacquiao ក្នុង​វ័យ ៣៥​ឆ្នាំ កំពុង​បង្កើន​ការហ្វឹកហាត់​  ទាំង​ផ្នែក​កម្លាំង និង​បច្ចេកទេស​របស់​ខ្លួន ដើម្បី​ទទួលបាន​ជោគជ័យ លើ​ការប្រកួត​នៅពេល​ខាងមុខ​។​

Manny Pacquiao ធ្លាប់​ប្រកួត​ចាញ់ Timothy Bradley ម្ដង​ហើយ​កាលពី​ឆ្នាំ ២០១២ ដោយ​ការសម្រេច​របស់​អាជ្ញាកណ្តាល  ហាក់ដូចជា​មាន​ភាពចម្រូងចម្រាស់ ដែល​ទស្សនិកជន នឹង​ស្មាន​មិន​ដល់​។​

​កាលពី​ថ្ងៃ​ទី ២៤ ខែ វិច្ឆិកា ឆ្នាំ ២០១៣ Pacquiao បាន​យក​ឈ្នះ​កីឡាករ Brandon Rios ដោយ​ពិន្ទុ​។​

លោក Manny Pacquiao ជា​អ្នក​ប្រដាល់​ សំណព្វចិត្ត​ក្នុង​ទ្វីប​អាស៊ី អាយុ​៣៤​ឆ្នាំ មាន​កំណត់ត្រា​ប្រកួត ៦២​ដង ដោយ​ឈ្នះ​៥៥ ស្មើ​២ និង​ចាញ់​៥ ហើយ​ក្នុងនោះ លោក​ផ្ដួល​គូប្រកួត​ឲ្យ​សន្លប់ ៣៨​ដង​។​

​ចំណែក លោក Timothy Bradley  អាយុ​៣១​ឆ្នាំ មាន​កំណត់ត្រា​ប្រកួត​៣១​ដង ឈ្នះ​៣១​ដង មិន​ដែល​ចាញ់ មិន​ដែល​ស្មើ និង​វាយ​គូប្រកួត​ឲ្យ​សន្លប់​ចំនួន​១២​ដង​៕

ប្រភព​ ដោយ : VOD