ក្នុងពិធីបូកសរុប ការងារប្រចាំឆ្នាំ នៅក្រសួងមហាផ្ទៃនៅថ្ងៃទី២០ ខែកុម្ភៈ លោកនាយករដ្ឋមន្រ្តី ហ៊ុន សែន បានលើកឡើងថា ទន្ទឹមនឹងការអភិវឌ្ឍន៍ លើវិស័យផ្សេងៗក្នុងពេលបច្ចុប្បន្ននេះ ការបម្រើសេវាសាធារណៈ ដល់ប្រជាពលរដ្ឋ ចំពោះការធ្វើលិខិតស្នាម ការដាក់កន្លែង ត្រួតពិនិត្យតាមផ្លូវប្រមូលប្រាក់ ការបង់ពន្ធជាដើម កំពុងធ្វើឲ្យ ប្រជាពលរដ្ឋ មានការលំបាក «កិច្ចការខ្លះគេធ្វើតែ មួយថ្ងៃ ឬមួយព្រឹក ឬមួយពេល ត្រូវការឲ្យគាត់ មួយអាទិត្យ ហើយមួយអាទិត្យ ហ្នឹងដើម្បីអី? វាមានអាដើម្បីអី…។ អ៊ីចឹងគាត់វិល ចុះវិលឡើង ពេលខ្លះកុំ បន្ទោសគាត់ ថាគាត់ម៉េចមិនមាន លិខិត បញ្ជាក់ អាហ្នឹងគាត់ថាខ្ញុំទៅ៥ដងហើយ តែធ្វើវាមិនបាន ឥឡូវខ្ញុំវាអត់មាន។ នេះបន្ទោសគាត់មិន បានទេមកពីយើង។ អ៊ីចឹងទេ ការផ្លាស់ប្តូរឥរិយាបថ នៅកន្លែងនេះគឺសំខាន់ណាស់»។
ក្នុងពិធីនោះ លោកនាយករដ្ឋមន្រ្តី ហ៊ុន សែន ក៏បានលើកឡើងថា ដោយសារមន្ត្រីបង់ពន្ធនៅរាជធានីភ្នំពេញធ្វើការយឺតយ៉ាវ នាំឲ្យម្ចាស់យានយន្ត ជាច្រើនសម្រេចចិត្ត ទៅបង់ពន្ធនៅខេត្តកណ្តាល «ដោយសារតែការបង់ពន្ធ យានយន្ត អាបង់ពន្ធផ្លូវស្អីៗនេះ ភ្នំពេញធ្វើយឺត ដល់ភ្នំពេញធ្វើយឺត គេទៅបង់ពន្ធនៅខេត្តកណ្តាល ធ្វើនៅខេត្តកណ្តាល។ អ៊ីចឹងទេ ខេត្តកណ្តាលទាញលុយមួយឆ្នាំៗ ពីភ្នំពេញមិនតិចទេ អាហ្នឹងគ្រាន់គេយកលុយទៅបង់ពន្ធសោះ សេវាពន្ធរបស់យើង វាពិបាកពេក»។
អ្នកសម្របសម្រួលសម្ព័ន្ធ គណនេយ្យភាពសង្គម អាស៊ីបូព៌ា និង ប៉ាស៊ីហ្វិច លោក សន ជ័យ មានប្រសាសន៍ថា ដើម្បីឲ្យការបញ្ជារបស់ លោកនាយករដ្ឋមន្ត្រី ហ៊ុន សែន មានប្រសិទ្ធិភាពក្នុងការអនុវត្តន៍លុះត្រាតែមានការចូលរួមពី ប្រជាពលរដ្ឋ និងដៃគូអភិវឌ្ឍន៍ផ្សេងៗ។ លោកបញ្ជាក់ថា ប្រសិនបើរដ្ឋាភិបាលដោះស្រាយបញ្ហានេះ មិនបានទាន់ពេលនោះ សំឡេងឆ្នោតរបស់គណបក្សប្រជាជនកម្ពុជា កាន់តែធ្លាក់ចុះទៀតនៅពេល បោះឆ្នោតក្រោយៗ។
ពេលកោះប្រជុំគណៈរដ្ឋមន្ត្រីអាណត្តិទី៥ លើកដំបូង កាលពីខែកញ្ញា លោកនាយករដ្ឋមន្ត្រី ហ៊ុន សែន ចំណាយពេលស្ទើរពេញមួយថ្ងៃ ណែនាំមន្ត្រីរបស់ខ្លួនឲ្យធ្វើកំណែទម្រង់លើវិស័យផ្សេងៗ ដើម្បីបម្រើសេវាដល់ប្រជាពលរដ្ឋម្ចាស់ឆ្នោតឲ្យបានត្រឹមត្រូវ។ ការចាប់ផ្តើមយកចិត្តបម្រើសេវាធារណៈនេះ បន្ទាប់គណបក្សប្រជាជនរបស់ លោកនាយករដ្ឋមន្ត្រី ហ៊ុន បាត់អាសនៈនៃការគាំទ្រពីប្រជាពលរដ្ឋចំនួន២២ ក្នុងពេលបោះឆ្នោតកាលពីថ្ងៃទី២៨ ខែកក្កដា ឆ្នាំ២០១៣។ បាត់បង់អាសនៈនេះ អ្នកវិភាគលើកឡើងថា ដោយសារតែអំពើពុករលួយ បក្សពួកនិយម ការបំផ្លាញធនធានធម្មជាតិ និងការបម្រើសេវាសាធារណៈមិនបានល្អជាដើម៕
ប្រភព (VOD) អត្ថបទដោយ : ពៅ មេត្តា
