មន្ត្រីក្រសួងសុខាភិបាលកម្ពុជា បញ្ជាក់ឱ្យដឹងថា នៅប្រទេសកម្ពុជា មានអ្នកឆ្លងជំងឺផ្ដាសាយបក្សី ៣ នាក់ហើយ នៅដើមឆ្នាំ ២០១៤ នេះ។ មន្ត្រីផ្នែកជំងឺឆ្លងនៃក្រសួងសុខាភិបាល អំពាវនាវឱ្យពលរដ្ឋប្រុងប្រយ័ត្នខ្ពស់ចំពោះជំងឺនេះ ជាពិសេស នៅតំបន់ដែលមានសត្វឈឺស្លាប់។
មន្ត្រីនាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលបញ្ជាក់ថា ក្នុងរយៈពេលជិតពីរខែដើមឆ្នាំ២០១៤ នេះ មានករណីឆ្លងជំងឺផ្ដាសាយបក្សីពីសត្វទៅមនុស្សចំនួន ៣ ករណី និងសង្ស័យ ១ ករណី។
អនុប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល គឺលោកវេជ្ជបណ្ឌិត លី សូវ៉ាន់ មានប្រសាសន៍បញ្ជាក់នៅល្ងាចថ្ងៃទី១៧ កុម្ភៈថា ករណីឆ្លងជំងឺផ្ដាសាយបក្សី ទី ៣ ត្រូវបានរកឃើញ បន្ទាប់ពីក្រុមអ្នកជំនាញចុះទៅពិនិត្យស្រាវជ្រាវ និងតាមដានសុខភាពនៅភូមិរបស់កុមារ នៅខេត្តក្រចេះ ដែលស្លាប់កាលពីថ្ងៃទី៧ កុម្ភៈ។
លោក លី សូវ៉ាន់៖ «គឺយើងបានរកឃើញក្នុងអំឡុងពេលតាមដានសុខភាពហ្នឹង រកឃើញ (positive) មួយទៀត។ នៅភូមិជាមួយគ្នា យើងបានរកឃើញ positive ហើយយើងសង្គ្រោះជីវិតគាត់ទាន់ពេលវេលាហើយ ហើយយើងឱ្យថ្នាំគាត់ទៅ គាត់ជា។ គាត់ធូរស្បើយច្រើនហើយ»។
លោកវេជ្ជបណ្ឌិត លី សូវ៉ាន់ ឱ្យដឹងថា ករណីទី ៣ នេះ គឺឆ្លងទៅកុមារអាយុ ៤ ឆ្នាំ ដែលរស់នៅក្នុងភូមិក្បាលត្រាច ឃុំស្រែចា ស្រុកស្នួល ខេត្តក្រចេះ។
កាលពីថ្ងៃទី ៧ កុម្ភៈ កុមារាអាយុ ៨ឆ្នាំម្នាក់ នៅភូមិក្បាលត្រាច ដែរ បានស្លាប់ ហើយវិជ្ជាស្ថានប៉ាស្ទ័រកម្ពុជា បញ្ជាក់ថា មានមេរោគវីរុសផ្ដាសាយបក្សី H5N1។ ដោយឡែក នៅព្រឹកថ្ងៃដដែលនោះ ប្អូនស្រីអាយុ ២ឆ្នាំរបស់កុមារារូបនេះ បានស្លាប់ក្នុងអាការៈគ្រុនក្ដៅដូចគ្នា ដែលគ្រូពេទ្យសង្ស័យថា អាចមានជំងឺផ្ដាសាយបក្សីដែរ ប៉ុន្តែគ្រូពេទ្យមិនអាចបញ្ជាក់ច្បាស់ទេ ពីព្រោះកុមារីនោះស្លាប់មុនពេលពិនិត្យឈាម។
កាលពីថ្ងៃទី១ កុម្ភៈ វិជ្ជាស្ថានប៉ាស្ទ័រកម្ពុជា បានបញ្ជាក់តេស្តឈាម រកឃើញករណីឆ្លងមេរោគវីរុសផ្ដាសាយបក្សី H5N1 ទី១ ដែលកើតលើកុមារាអាយុ ៥ ឆ្នាំម្នាក់ នៅភូមិចុងដា ឃុំត្បូងក្រពើ ស្រុកសន្ទុក ខេត្តកំពង់ធំ។ បច្ចុប្បន្នកុមារារូបនេះ កំពុងស្ថិតនៅក្រោមការព្យាបាលរបស់មន្ទីរពេទ្យជ័យវរ្ម័នទី ៧ នាខេត្តសៀមរាប នៅឡើយ។
ក្រសួងសុខាភិបាលកម្ពុជា និងអង្គការសុខភាពពិភពលោក (WHO) បញ្ជាក់ថា ក្រុមអ្នកជំនាញចុះស្រាវជ្រាវឃើញថា កុមារដែលឆ្លងជំងឺផ្ដាសាយបក្សីទាំងនេះ បានប៉ះពាល់ និងបរិភោគមាន់ឈឺ។
លោកវេជ្ជបណ្ឌិត លី សូវ៉ាន់ មានប្រសាសន៍ថា ជំងឺផ្ដាសាយបក្សី គឺឆ្លងពីបក្សីទៅបក្សី ក៏ប៉ុន្តែជួនកាលជំងឺនេះ អាចឆ្លងពីបក្សីមកមនុស្សដែរ។ លោកថា គិតត្រឹមល្ងាចថ្ងៃទី១៧ កុម្ភៈ ក្រុមអ្នកជំនាញបានរកឃើញមានមេរោគវីរុសផ្ដាសាយបក្សី H5N1 លើសត្វបក្សី គឺទាមួយកន្លែង គឺនៅខេត្តកំពង់ចាម៖ «ឥឡូវនេះដែលយើង Confirm (បញ្ជាក់ថា) មាន (Positive) គឺនៅកំពង់ចាម។ នៅ (ស្រុក) បាធាយ កំពង់ចាម លើសត្វបក្សី។ ប៉ុន្តែ រហូតមកដល់ពេលនេះ អត់ឆ្លងមកមនុស្សទេ»។
លោកវេជ្ជបណ្ឌិត លី សូវ៉ាន់ ថ្លែងថា នៅពេលនេះ ក្រុមអ្នកជំនាញកំពុងតាមដានសុខភាពនៅកន្លែងដែលសង្ស័យ និងកើតមានជំងឺផ្ដាសាយបក្សីឱ្យបានពីរសប្ដាហ៍ ដើម្បីធានាថា មិនមានជំងឺនេះតទៅទៀត។
តួលេខរបស់ក្រសួងសុខាភិបាលបង្ហាញថា ចាប់តាំងពីពេលរកឃើញអ្នកឆ្លងមេរោគផ្ដាសាយបក្សីដំបូងនៅកម្ពុជា ក្នុងឆ្នាំ២០០៥ មកដល់ពេលនេះ មានចំនួន ៥០ករណីហើយ ដែលភាគច្រើនជាកុមារអាយុក្រោម ១៤ឆ្នាំ។ មានតែ ១៦ ករណីទេ ដែលមាននៅមានជីវិត។
កុមារដែលឆ្លងជំងឺផ្ដាសាយបក្សី មានអាការៈគ្រុនក្ដៅ ហូរសំបោរ និងឈឺបំពង់ក ឈឺពោះ ពិបាកដកដង្ហើម និងចេះតែដេកសន្លឹម។
លោកវេជ្ជបណ្ឌិត លី សូវ៉ាន់ លោកអំពាវនាវឱ្យពលរដ្ឋប្រុងប្រយ័ត្នខ្ពស់ចំពោះជំងឺផ្ដាសាយបក្សី ហើយផ្ដល់ព័ត៌មានតាមទូរស័ព្ទលេខ ១១៥ ឬ ០១២ ៤៨ ៨៩ ៨១ បើសង្ស័យថា មានជំងឺនេះនៅក្នុងស្រុកភូមិ៕
មនុស្ស៣នាក់ឆ្លងជំងឺផ្ដាសាយបក្សីនៅដើមឆ្នាំ២០១៤
ប្រភពដោយ : RFA អត្ថបទដោយ : ឡេង ម៉ាលី
