កម្មករ- កម្មការិនី ជាង៣០០រោងចក្រ កាលពីល្ងាច ថ្ងៃចន្ទម្សិលមិញ ធើ្វពហិការធ្វើការថែមម៉ោង ដើម្បីទាមទារឲ្យរដ្ឋា ភិបាលក៏ដូចជាសមាគមរោងចក្រ ដំឡើងប្រាក់ឈ្នូលឲ្យពួកគេដល់១៦០ដុល្លារ និងទាមទារឲ្យដោះលែងអ្នកជាប់ឃុំ២១នាក់។
ប្រធានសហព័ន្ធសហជីពចលនាកម្មករ លោកប៉ាវ ស៊ីណា ប្រាប់ VOD នៅព្រឹកថ្ងៃអង្គារទី២៥ ខែកុម្ភៈនេះថា កាលពីម្សិល មិញក្រុមការងាររបស់លោកបានចុះទៅដល់ទីតាំងរោងចក្រមួយចំនួន ហើយសាកសួរទៅដល់ក្រុមកម្មករ បានឲ្យដឹងថា កម្ម ករបាន ធ្វើពហិការធ្វើការថែមម៉ោង។ លោកបន្តថា កម្មករដែលធ្វើពហិការធ្វើការថែមម៉ោងនេះ មិនមែនរាប់តែ គឺរាប់បញ្ចូលទាំងរោងចក្រដែលមិនមែនជាសមាជិកសហជីពរបស់លោក ដោយពួកគេស្ម័គ្រចិត្តធ្វើដោយខ្លួនឯង។
ប្រធានសហភាពសហជីពកម្ពុជា លោក រ៉ុង ឈុន មានប្រសាសន៍ថា សម្រាប់រោងចក្រដែលជាបណ្តាញសហភាពសហជីពរបស់លោក ធ្វើពហិការកាលពីម្សិលមិញប្រមាណជា៨០ភាគរយ ដោយពួកគេទាមទារឲ្យដំឡើងប្រាក់ឈ្នួល និងដោះលែងអ្នកជាប់ឃុំ២១នាក់ ។ លោករ៉ុង ឈុន អំពាវនាវទៅដល់កម្មកររោងចក្រគ្រប់វិស័យ ក៏ដូចជាសាធារណជន ចូលរួមធ្វើកូដកម្មទាំងអស់គ្នា ដើម្បីទទួលបានជោគជ័យ ។
ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា លោក ស មូរ៉ា មានប្រសាសន៍ថា បណ្តាញសហជីពរបស់លោកធ្វើការតាមធម្មតាព្រោះពួកគេមិនមានម៉ោងធ្វើការថែមនោះទេ ប៉ុន្តែក្រុមការងាររបស់លោកបានចុះសាកសួរទៅឲ្យដឹងថា មានរោងចក្រមួយចំនួនបិទទ្វាបង្ខំកម្មករឲ្យធ្វើការថែមម៉ោង។ VOD មិនអាចទាក់ទងប្រធានសមាគមរោងចក្រកាត់ដេរ លោក វ៉ាន់ ស៊ូអៀង បានទេ។
កាលពីថ្ងៃចន្ទ ម្សិលមិញក្រសួងការងារអំពាវនាវកុំឲ្យកម្មករ-កម្មការិនី ចូលរួមធ្វើកូដកម្មជាមួយសហជីព និងសមាគមទាំង១៨ ដែលទាមទារឲ្យដោះលែងអ្នកជាប់ឃុំ២១នាក់ និងដំឡើងប្រាក់ឈ្នូលកម្មករដល់១៦០ដុល្លារ ដោយលើកឡើងថា ដើម្បីប្រយោជន៍ការងាររបស់ខ្លួន គឺមិនត្រូវ ចូលរួមធ្វើកូដកម្មអីនោះទេ។ សម្រាប់រឿងប្រាក់ឈ្នួលក្រសួងកំពុងតែធ្វើការស្រាវជ្រាវ និងសិក្សារកចំណុចរួមមួយដើម្បីឲ្យកម្មករ ក៏ដូចជានិយោជកអាចទទួលយកបានទាំងសងខាង។ ប៉ុន្តែខាងសហជីពកម្មករថា អ្វីដែលក្រសួងអំពាវនាវនោះ គ្រាន់តែជាលេសមួយប៉ុណ្ណោះ ៕
កម្មករ- កម្មការិនីជាង៣០០រោងចក្រធ្វើពហិការធ្វើការថែមម៉ោងនៅថ្ងៃចន្ទម្សិលមិញ
ប្រភព និង អត្ថបទ ដោយ : ជន ស្រីណុច (VOD)
