ប្រជាពលរដ្ឋប្រមាណ៦០០គ្រួសារ ជំរុញឲ្យអាជ្ញាធរខេត្តបន្ទាយមានជ័យ ដោះស្រាយបញ្ហាចម្រូងចំរាសដីធ្លីជាមួយក្រុមហ៊ុន បន្ទាប់ពីអាជ្ញាធរកោះហៅតំណាងប្រជាពលរដ្ឋចូលប្រជុំនៅសាលាស្រុកថ្មពួកកាលពីថ្ងៃទី២៤ ខែកុម្ភៈ ឆ្នាំ២០១៤។
ប្រជាពលរដ្ឋមានជំលោះដីធ្លីនៅឃុំបន្ទាយឆ្មា និងឃុំតាម៉ាំង ស្រុកថ្មពួក ខេត្តបន្ទាយមានជ័យ លោក ហែ កំហ៊ន អាយុ៥០ឆ្នាំ ប្រាប់VODដឹងថា ដីរបស់ពូកគាត់ត្រូវបានក្រុមហ៊ុនឈូសឆាយរំលោភយកចាប់តាំងពីឆ្នាំ២០០៨ តែអាជ្ញាធរ និងអ្នកដែលក់ពាព័ន្ធមិនដែលរកដំណោះស្រាយឲ្យពួកគាត់ទេ។ លោកបន្ដថា លោកសុំអំពាវនាវដល់អាជ្ញាធរ និងមន្ដ្រីពាក់ព័ន្ធ ប្រញាប់ដោះស្រាយបញ្ហានេះ។
ប្រជាពលរដ្ឋម្នាក់ទៀតលោក ស ផុន អាយុ៤៣ឆ្នាំបានមានប្រសាសន៍ឲ្យដឹងដែរថា ពួកគាត់កំពុងរង់ចាំអាជ្ញាធរដោះស្រាយបញ្ហាដីធ្លី ព្រោះជម្លោះនេះអូសបន្លាយជាយូរឆ្នាំមកហើយ។ លោកបន្ដថា អាជ្ញាធរត្រូវតែជំរុញការដោះស្រាយបញ្ហានេះឲ្យបានឆាប់ ព្រោះ បច្ចុប្បន្នប្រជាពលរដ្ឋមិនមានមុខរបរទេ ដោយសារតែរង់ចាំការដោះស្រាយរឿងដីធ្លី។
មេភូមិប្រាសាទត្បែង ឃុំបន្ទាយឆ្មា លោក ឯក វណ្ណា មានប្រសាសន៍ឲ្យដឹងដែរថា អភិបាលខេត្តបន្ទាយមានជ័យបានកោះហៅប្រជាពលរដ្ឋទៅពិភាក្សារឿងនេះ ហើយអភិបាលខេត្តបានយល់ព្រមលើបីចំណុចធំៗគឺ ទី១. ធ្វើតាមអនុក្រិតលេច១៩២ ទី២. ប្រជាពលរដ្ឋចុះអត្តសញ្ញាណប័ណ្ណកម្មសិទ្ធិដីធ្លី ដើម្បីឲ្យក្រុមការងារចុះវាស់វែង ទី៣.បង្កើតគណៈកម្មការឯករាជ និងឲ្យក្រុមហ៊ុនបញ្ឈប់ការ ឈូសឆាយដីបន្តទៀត ហើយឲ្យ ប្រជាពលរដ្ឋផ្អាកការតវ៉ា។
អភិបាលខេត្តបន្ទាយមានជ័យលោក គោស៊ុំ សារឿត មានប្រសាសន៍ប្រាប់វិទ្យុVODថា អាជ្ញាធរ និងមន្ដ្រីពាក់ព័ន្ធ កំពុងប្រជុំពិភាក្សាពីបញ្ហានេះ។ លោកបន្ដថា លោកបានកោះហៅប្រជាពលរដ្ឋមកប្រជុំ តែមិនមានប្រជាពលរដ្ឋមកស្ដាប់ពីមូលហេតុ និងការដោះស្រាយនូវរាល់បញ្ហាទាំងនេះទេ។
អ្នកសម្របសម្រួលនៃអង្គការលី កា ដូ ប្រចាំខេត្តបន្ទាយមានជ័យ លោក ភុន ឈិន មានប្រសាសន៍ ឲ្យVODដឹងដែរថា កាលពីម្សិលមិញមានអភិបាលខេត្ត តំណាងក្រុនហ៊ុន អភិបាលស្រុក អង្គការសង្គមស៊ីវិល និងប្រជាពលរដ្ឋបានជួបប្រជុំគ្នា ហើយបានសម្រេចយុត្តិសាស្ដ្រធំៗមួយចំនួន។ លោកបន្ដថា លោកសុំជំរុញឲ្យពន្លឿនការដោះស្រាយបញ្ហានេះឲ្យបានឆាប់ ពីព្រោះជម្លោះរវាងក្រុមហ៊ុន និងប្រជាពលរដ្ឋបានអូសបន្លាយតាំងពីឆ្នាំ២០០៨មក។
ក្រុមហ៊ុនចំនួនពីរគឺ ក្រុមហ៊ុនឈុន លីមគ្រុប និងក្រុមហ៊ុន សំណង់លៀង ប៊ូ ដែលបានឈូសឆាយដីនៅតំបន់ស្រុកថ្មពួក បណ្ដាលឲ្យមានការប៉ះពាល់ដល់ប្រជាពលរដ្ឋនៅឃុំតាម៉ាំងចំនួន២៦៨គ្រួសារស្មើនិងផ្ទៃដី១០០២ ហិកតា និងនៅឃុំបន្ទាយឆ្មាប៉ះពាល់ដល់ប្រជាពលរដ្ឋចំនួន៤២៨គ្រួសារ ស្មើនឹងផ្ទៃដី៩៣០ហិកតាចាប់តាំងពីឆ្នាំ២០០៨។
ពលរដ្ឋជាង៦០០គ្រួសារនៅខេត្តបន្ទាយមានជ័យជំរុញឲ្យអាជ្ញាធរដោះស្រាយបញ្ហាដីធ្លី
ប្រភព និង អត្ថបទ ដោយ : សុទ្ឋ គឹមសឿន (VOD)
