ស្របពេលដែលអាជីពសិល្បៈកាន់តែទទួលបានជោគជ័យជាលំដាប់ ស្រាប់តែពេលនេះ នាយ ពែកមី ងាកមកបើកហាងសម្អាងការបន្ថែមទៀត សមដូចពាក្យចាស់ដំណាលថា នាយមានឆ្អឹងកាន់តែអណ្ដែតឡើងហើយ។
“សូមបងប្អូនជួយគាំទ្រ ពែកមីសម្អាងការប៊ូតា ដែលជារបស់ខ្ញុំបាទទើបបើកថ្មី”។ ជារឿយៗ ទស្សនិកជនតែងបានឮពាក្យនេះ ចេញពីមាត់របស់តារាកំប្លែងខាងលើផ្ទាល់ លើកញ្ចក់ទូរទស្សន៍ CTN និងការសរសេរលើ Wall នៃបណ្ដាញសង្គមរបស់ខ្លួន។
ថ្ងៃនេះ ពែកមី បានប្រាប់ Sabay ថា នេះជាសម្អាងការថ្មីរបស់គេប្រាកដមែន បង្កើតឡើងសម្រាប់ភរិយារបស់ខ្លួន ដើម្បីឲ្យនាងជាអ្នកមើលការខុសត្រូវ និង បង្កើនប្រាក់ចំណូលបន្ថែមទៀតសម្រាប់គ្រួសារ។ តារាកំប្លែងមានប្រភពពីខេត្តស្វាយរៀងរូបនេះ ក៏នឹងកៀរគរបងប្អូនបង្កើតមានដូចជានាយ គ្រឿន និងនាយ ក្រាន់ ឬសមាជិកក្រុមកំប្លែងផ្សេងទៀតមកចូលរួមជាមួយ។
លោកបញ្ជាក់ថា សម្អាងការថ្មីនេះ នឹងបើកសម្ពោធជាផ្លូវការនៅថ្ងៃទី ៥ ខែក្រោយ ប្រកបដោយក្ដីសង្ឃឹមថា ទទួលបានជោគជ័យមិនខានឡើយ ព្រោះមានការសួរនាំ និងកក់បណ្ដើរៗហើយដែរ ខណៈដែលការគាំទ្រមានស្រាប់ រួមទាំងការបញ្ចុះតម្លៃសម្រាប់ដំណើរការដំបូងនេះ។
កន្លងមកមានហាង “សុខគាសម្អាងការប៊ូតា” ដែលគេដឹងថា ជារបស់ លោក ដួង សុខគា។ ហេតុអ្វីពេលនេះមានហាង “ពែកមីសម្អាងការប៊ូតា” ដែលមើលទៅមានឈ្មោះស្រដៀងគ្នាដូច្នេះ?
ឆ្លើយតបសំណួរដ៏រសើបខាងលើនាយ ពែកមី បញ្ជាក់ថា នេះជាសម្អាងការថ្មីសុទ្ធសាធ ដែលជាសាខាទី២បន្ទាប់ពីលោក ដួង សុខគា ដោយប្រើប្រាស់បុគ្គលិក និង ក្រុមអ្នកកាត់សក់ដែលមានស្រាប់ ថ្មីតែសម្ភារៈតែប៉ុណ្ណោះ។ ដោយឡែកចំពោះប្រភពទុន ឬយ៉ាងណានោះ តារាកំប្លែងល្បីរូបនេះសុំមិនធ្វើការបញ្ជាក់នោះទេ។
បើយោងទៅលើឈ្មោះហាងគេអាចសន្និដ្ឋានថា សម្អាងការរបស់ នាយ ពែកមី ប្រហែលជាមានការជួយជ្រោមជ្រែងពីបងធម៌នៅអូស្ត្រាលី ដែលជាម្ចាស់ហាង “សុខគាប៊ូតាសម្អាងការ” នោះហើយមើលទៅ ទោះបីជាសាមីខ្លួននាយ ពែកមី ព្យាយាមលាក់បាំងយ៉ាងណាក៏ដោយ៕
ស្ងាត់ៗ នាយ ពែកមី ក្លាយជាថៅកែសម្អាងការ
ប្រភព និង អត្ថបទ ដោយ Sabay
