ប្រជាពលរដ្ឋខ្មែរកម្ពុជាក្រោម រស់នៅស្រុក បុរីជលសារ ខេត្តតាកែវ
ប្រមាណ៧០នាក់ នៅព្រឹកថ្ងៃព្រហស្បតិ៍នេះ
បាននាំគ្នាទៅសុំអន្តរាគមន៍ពី សមាគមអាដហុក ឲ្យជួយការពារផ្លូវច្បាប់
ខណៈដែលសាលាដំបូងខេត្ត កោះហៅប្រជាពលរដ្ឋ ៣រូប
ឲ្យចូលទៅបំភ្លឺពាក់ព័ន្ធទៅនឹងការឈូសឆាយដីព្រៃលិចទឹក
ដែលជាតំបន់អភិរក្សរបស់រដ្ឋ។
លោក វី ចាន់ ពលរដ្ឋខ្មែរកម្ពុជាក្រោមម្នាក់
ក្នុងចំណោមពលរដ្ឋបីនាក់ ដែលតុលាការកោះហៅ ឲ្យដឹងថា
ពួកគាត់ទាំងអស់គ្នា បានចូលទៅរស់នៅ ក្នុងភូមិសង្គមថ្មី
ឃុំត្រពាំងក្រសាំង ស្រុកបុរីជលសារ ខេត្តតាកែវ
អស់រយៈពេលជាង២០ឆ្នាំមកហើយ ហើយបច្ចុប្បន្ននេះ
ពួកគាត់គ្មានផ្ទះសម្បែងរស់នៅ និងដីសម្រាប់ធ្វើស្រែ
ចិញ្ចឹមជីវិតនោះទេ។ លោកបន្តថា
ពួកគាត់ទៅសមាគមការពារសិទ្ធិមនុស្សអាដហុកប្រចាំខេត្តតាកែវនោះ
ដើម្បីសុំឲ្យសមាគមជួយរកមេធាវីការក្តីជូនពួកគាត់
ព្រោះខ្លាចតុលាការឃុំខ្លួនគាត់
បន្ទាប់ពីទទួលបានដីកាហៅទៅបំភ្លឺករណីដីធ្លីនេះ «ដីនេះបើតាម
សហគមន៍ខ្ញុំ គាត់កាន់កាប់ គាត់ថែរក្សា ដីនេះពី៩៧ រហូតមក
ហើយយើងធ្វើនោះ វាគ្មានប្រភពទឹក យើងធ្វើជួនកាលធ្វើ ជួលកាលចោលទៅ
ឆ្នាំណាមានទឹក យើងធ្វើ គ្មានទឹកយើងឈប់
ឥឡូវគ្មានមេប្រភពទឹកយើងនៅតែធ្វើ អ៊ឹចឹងបានគេកោះហៅ»។
មន្ត្រីសម្របសម្រួលសមាគមអាដហុកប្រចាំខេត្តតាកែវ លោក អ៊ុន ថានន្ត
មានប្រសានស៍ថា លោកនឹងស៊ើបអង្កេតករណីនេះ
និងជួយអន្តរាគមន៍រកមេធាវីការពារក្តីជូនពួកគាត់។
លោកបានស្នើឲ្យប្រជាពលរដ្ឋ បំពេញទម្រង់បែបបទ
រៀបចំឯកសារបញ្ជូនទៅតុលាការ ដើម្បីសុំពន្យារពេល ទៅក្រោយសប្ដាហ៍ទៀត
ខណៈដែលមេធាវីរបស់សមាគមជាប់រវល់ «គាត់ត្រូវតែមានមេធាវី
ហើយនិងជួយស៊ើបអង្កេតរឿង ដីរបស់គាត់ផង ដែលគាត់គ្មានដីធ្វើស្រែទេ
ហើយអ៊ីចឹងទៅធ្វើនៅកន្លែងហ្នឹង គេហាមឃាត់គាត់អ៊ីចឹង
ខ្ញុំមានតែឲ្យទម្រង់គាត់ ធ្វើម៉េចឲ្យគាត់បំពេញតាមទម្រង់ បែបបទមក
ថាគាត់មានដីប៉ុន្មាន ធ្លាប់ធ្វើប៉ុន្មានម៉ែត្រអ៊ីចឹង
ដាក់មកអាជ្ញាធរខេត្ត ដើម្បីឲ្យអាជ្ញាធរខេត្ត
ជួយដោះស្រាយអន្តរាគមន៍»។
កាលពីថ្ងៃទី១៥ ខែកុម្ភៈ ចៅក្រមស៊ើបសួរសាលាដំបូងខេត្តតាកែវ
បានកោះហៅប្រជាពលរដ្ឋបីនាក់ ឈ្មោះ វីម៉ាយ ឈ្មោះ វី ចាន់ និង ឈ្មោះ
ស៊ុនរុំ ទៅបំភ្លឺករណីឈូសឆាយដីព្រៃតំបន់អភិរក្សសត្វគ្រៀល
ក្នុងឃុំ ត្រពាំងក្រសាំង ស្រុក បុរីជលសារ ខេត្ត តាកែវ
នៅថ្ងៃទីព្រហស្បតិ៍នេះ។
VOD មិនអាចសុំការអត្ថាធិប្បាយករណីនេះ ពីលោក វ៉ាន់ សែនវិសុទ្ធ
ចៅក្រមស៊ើបសួរសាលាដំបូងខេត្តតាកែវ បានទេនៅថ្ងៃព្រហស្បតិ៍នេះ។
បើតាមការឲ្យដឹងពីប្រជាពលរដ្ឋ ពួកគាត់ចំនួន ៦៨គ្រួសារ
បានឈូសឆាយដីព្រៃដើម្បីបង្កបង្កើនផល ចាប់តាំងពីឆ្នាំ១៩៩៧
មុនពេលដែលរាជរដ្ឋាភិបាល ចេញអនុក្រឹត្យនៅឆ្នាំ២០០៦ យកដីនៅតំបន់នេះ
ដាក់ជាតំបន់អភិរក្សសត្វគ្រៀលរបស់រដ្ឋ៕
ពលរដ្ឋខ្មែរក្រោម នៅខេត្តតាកែវ សុំអន្តរាគមន៍ពី សមាគម អាដហុក ករណីឈូសឆាយដីព្រៃ
ដោយ៖ ឡាយ សាមាន (VOD)
