ក្រសួងសុខាភិបាល និងអង្គការសុខភាពពិភពលោក(WHO) រកឃើញករណី២ថ្មីបន្ថែមនៃជំងឺផ្តាសាយបក្សី(H5N1) កើតឡើងនៅខេត្តកំពង់ចាម ដែលនេះជាករណីទី៤ និងទី៥ ហើយសម្រាប់ឆ្នាំ២០១៤នេះ។
សេចក្តីប្រកាសព័ត៌មានរបស់ក្រសួង ចេញផ្សាយនៅថ្ងៃទី២៧ ខែកុម្ភៈ ឆ្នាំ២០១៤នេះ ឲ្យដឹងថា ករណីទីបួន កើតលើកុមារីម្នាក់ អាយុ១០ឆ្នាំ ដែលរស់នៅ ឃុំខ្នរដំបង ស្រុកជើងព្រៃ ខេត្តកំពង់ចាម និងករណីទី៥ កើតលើកុមារីមា្នក់ទៀត អាយុ ១១ឆ្នាំ រស់នៅ ឃុំក្រែក ស្រុកពញាក្រែក ខេត្តកំពង់ចាម ដែលកុមារីទាំងពីរត្រូវបានបញ្ជាក់ដោយវិទ្យាស្ថានប៉ាស្ទ័រកម្ពុជា នៅថ្ងៃទី២០ខែកុម្ភៈ ថាមានជំងឺផ្តាសាយបក្សី។ សេចក្តីប្រកាសព័ត៌មានបន្តថា បច្ចុប្បន្ន កុមារីទាំងពីរមានស្ថានភាពល្អប្រសើរនិងជាសះស្បើយវិញហើយ។
ករណីផ្តាសាយបក្សីនេះ ជាករណីទី៥២ហើយនៃជំងឺផ្តាសាយបក្សីនៅប្រទេសកម្ពុជា ហើយ៣៨ករណីក្នុងចំណោមនោះ កើតឡើងកុមារអាយុក្រោម១៤ឆ្នាំ និង២៧ករណីក្នុងចំណោម៥២ករណី កើតលើនារី។១៦ករណីក្នុងចំណោម៥២ករណី អ្នកជំងឺនៅមានជីវិត។
ករណីជំងឺផ្តាសាយបក្សី H5N1 នៅកម្ពុជា
ប្រភព : ទិន្នន័យពីនាយកដ្ឋានប្រយុទ្ធប្រឆាំងជំងឺឆ្លងនៃក្រសួងសុខាភិបាល
