ប្រធានគណបក្សសង្គ្រោះជាតិ លោក សម រង្ស៊ី ប្រកាសឲ្យអ្នកគាំទ្របក្សមួយនេះ ចូលរួមធ្វើបាតុកម្មទ្រង់ទ្រាយធំ ដើម្បីផ្លាស់ប្តូរថ្នាក់ដឹកនាំ តាមរយៈការបោះឆ្នោតឡើងវិញ ខណៈលោក ចុះសំណេះសំណាលជាមួយពលរដ្ឋ នៅឃុំត្រើយស្លា ស្រុកស្អាង ខេត្តកណ្តាល កាលពីថ្ងៃពុធម្សិលមិញ។
ការប្រកាសរបស់លោក សម រង្ស៊ី ធ្វើឡើង បន្ទាប់ពី លោកនាយករដ្ឋមន្ត្រីហ៊ុន សែន ប្រកាសឲ្យមានបាតុកម្មពីរតទល់គ្នា រវាងអ្នកគាំទ្រគណបក្សប្រជាជនកម្ពុជា និងគណបក្សសង្គ្រោះជាតិ នៅកន្លែងតែមួយ។ ប៉ុន្តែអ្នកវិភាគព្រមានថា នេះអាចជាការបង្ករឲ្យមានហិង្សាកើតឡើង។
នៅក្នុង វីឌីអូ Clip លើបណ្តាញសង្គម ហ្វេសប៊ុករបស់ លោក សម រង្ស៊ី ថ្លែងថា បាតុកម្មនឹងកើតមានឡើងវិញ នាពេលឆាប់ៗ ខាងមុខនេះ ប៉ុន្តែលោកមិនបានបញ្ជាក់ថា ធ្វើបាតុកម្មនៅថ្ងៃណាច្បាស់នោះទេ។ យ៉ាងណាក៏ដោយលោក អំពាវនាវឲ្យអ្នកគាំទ្រគណបក្សសង្គ្រោះជាតិ និងអ្នកមិនទាន់បានគាំទ្រ ចូលរួមបាតុកម្មអហិង្សា ជាមួយបក្សប្រឆាំងមួយនេះ ឲ្យបាន២លាននាក់ ។
អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន មានប្រសាសន៍ថា ការធ្វើបាតុកម្មរបស់គណបក្សសង្គ្រោះជាតិ មិនមែនជាជម្រើសល្អនោះទេ។ លោកថា អ្វីសំខាន់ ត្រូវយកបញ្ហាប្រឈមមកដោះស្រាយ ប្រសើរជាងការធ្វើបាតុកម្ម ដែលធ្វើឲ្យប៉ះពាល់ដល់សណ្តាប់ធ្នាប់សាធារណៈ។ លោកថា បើបក្សប្រឆាំងធ្វើបាតុកម្មដោយមិនធ្វើតាម នីតិវិធីច្បាប់ ហើយមានបញ្ហាអ្វីមួយកើតឡើង អ្នកដឹកនាំបាតុកម្មត្រូវទទួលខុសត្រូវចំពោះមុខច្បាប់។
ទោះជាយ៉ាង លោក កឹម សុខា អនុប្រធានគណបក្សសង្គ្រោះជាតិ បញ្ជាក់ថា បាតុកម្មគឺធ្វើឡើងដោយអហិង្សា ដើម្បីឲ្យមានការផ្លាស់ប្តូរតាមរយៈការបោះឆ្នោតឡើងវិញ។
នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវ(និចហ្វិច) លោក ហង្ស ពុទ្ធា យល់ថា បើមានធ្វើបាតុកម្មទ្រង់ទ្រាយធំ រវាងគណបក្សទាំងពីរ នៅកន្លែងតែមួយ នោះកំដៅនយោបាយនឹងកើតមានឡើង។ តែលោកថា ជម្រើសដែលល្អ គណបក្សទាំងពីរ ត្រូវធ្វើបាតុកម្មដោយសន្តិវិធី តាមរបៀបដូចយុទ្ធនាការឃោសនាបោះឆ្នោត។
ចាប់ពីចុងខែមករាមក មុនពេលដែលលោកនាយករដ្ឋមន្ត្រី ហ៊ុន សែន ប្រកាសឲ្យមានបាតុកម្មពីរស្របគ្នានោះ មានអ្នកគាំទ្រគណបក្សប្រជាជនកម្ពុជា និងកម្លាំងសមត្ថកិច្ចបានប្រមូលផ្តុំនៅកន្លែង និងពេលតែមួយដែលគណបក្សសង្គ្រោះជាតិជួបជុំអ្នកគាំទ្រ។ នៅគ្រានោះ ការប៉ះទង្គិចគ្នា បានកើតឡើងជាបន្តបន្ទាប់ដូចជា នៅខេត្តកណ្តាល ខេត្តកំពង់ចាម និងខេត្តព្រៃវែងជាដើម ដែលធ្វើឲ្យមេបក្សប្រឆាំង ព្រមានដកខ្លួនចេញពីតុ ចរចាមួយរយៈបើការរំខាននៅតែបន្ត៕
សង្គ្រោះជាតិ អំពាវនាវឲ្យមានអ្នកចូលរួមពីរលាននាក់ ដើម្បីធ្វើបាតុកម្មឡើងវិញ
ប្រភព និង អត្ថបទ ដោយ : ណាត សុភាព (VOD)
