ក្រសួងការបរទេសថៃស្នើសុំអគ្គលេខាធិការអង្គការសហប្រជាជាតិឲ្យមកសម្របសម្រួលបញ្ហានយោបាយដែលកើតមានជាងបីខែមកហើយដែលឈានដល់ការស្លាប់មនុស្សទៀតផង។
លោករដ្ឋមន្ដ្រីការបរទេសថៃ សូរ៉ាពុង្សទុកវិចាក់ចៃគុល មានប្រសាសន៍ថាស្ថានការណ៍នៅទីក្រុងបាងកករយៈពេលចុងក្រោយនេះមានស្ថានភាពអាក្រក់យ៉ាងខ្លាំងហើយចាំបាច់ត្រូវស្វែងរក អន្ដរាគមន៍និងការផ្ដល់អនុសាសមួយចំនួនរបស់លោកអគ្គលេខាធិការអង្គការសហប្រជាជាតិដើម្បីជួយបញ្ចប់វិបត្តិហើយឈានទៅដល់ការស្រុះស្រួលផ្នែកនយោបាយឡើងវិញ។
លោកសូរ៉ាពុង្សមានប្រសាសន៍ថាអង្គការសហប្រជាជាតិកំពុងតែប្រើប្រាស់តួនាទីរបស់ខ្លួនយ៉ាងសកម្មនៅក្នុងស្វែងរកដំណោះស្រាយដល់ប្រទេសជាច្រើននៅទូទាំងពិភពលោកដូចជាប្រទេសស៊ីរី ប្រទេសអ៊ុយក្លែន ប្រទេសអេស៊ីបនិងប្រទេសរ្វាន់ដាជាដើម។
លោករដ្ឋមន្ដ្រីបានឲ្យដឹងទៀតថាប្រសិនបើជំលោះ និងហិង្សាបានបន្ដកើតឡើងសហគមន៍អន្ដរជាតិលែងមានទំនុកចិត្តលើរាជាណាចក្រថៃទៀតឡើយ។ ការអំពាវនាវរបស់រដ្ឋមន្ដ្រីរបស់គណបក្សភឿថៃត្រូវបានអ្នកវិភាគមើលឃើញថារដ្ឋាភិបាលរបស់លោកស្រីយីងឡាក់ទំនងជាបាត់ជំនឿភាគច្រើនក្នុងការស្វែងរកអន្ដរាគមន៍ពីស្ថានប័នកំពូលៗ របស់ជាតិថៃព្រោះតែស្ថានការណ៍ងាយគ្រោះថ្នាក់បំផុតគឺដោយសារតែក្រុមប្រឆាំងមិនខ្លាចញញើតអ្វីឡើយចំពោះស្ថាប័នពង្រឹងច្បាប់ដូចជាស្ថាប័ន នគរបាលជាដើមហើយគណបក្សភឿថៃតែងតែភ័យខ្លាចពីការលូកដៃការធ្វើអន្ដរាគមន៍ដោយកងទ័ព៕
គណបក្សកាន់អំណាចនៅថៃទទូចសុំ (អសប) ជាអ្នកសម្របសម្រួលវិបត្តិនយោបាយ
ប្រភព និង អត្ថបទ ដោយ : នួន បូរិន (VOD)
