បើទោះមិនមានសកម្មភាពនៅក្នុងពិភព
សិល្បៈអស់ច្រើនឆ្នាំ ក៏តារាសម្ដែងស្រីល្បីឈ្មោះអ្នកនាងវ៉ាង ស្រីណូ
នៅតែទទួលបានការចាប់អារម្មណ៍ខ្ពស់ គ្រប់ពេលបង្ហាញមុខជាសាធារណៈ។
អ្វីដែលគេកត់សម្កាល់ គឺជីវិតឯកជនរបស់នាង
នៅតែមានឥទ្ធិពលធ្វើឲ្យគេតាមដាន
ដែលផ្ទុយស្រឡះពីក្រុមតារាធ្លាក់កូដឯទៀត។ អ៊ីចឹងហើយ
ទើបអ្នកនាងទាត់ចោលភ្លាមៗ នៅពេលមានការយល់ថា អ្នកនាងជាតារាម្នាក់
ដែលបានស្ដោះហើយលេបវិញ។
នៅលើទំព័រកាសែត និងទស្សនាវដ្ដី
នាមួយរយៈពេលមុន គ្មានអ្នកណាមិនដឹងនោះទេ ថាអ្នកនាងវ៉ាង ស្រីណូ
បានប្រកាសថាវិលមកប្រឡូកក្នុងសិល្បៈវិញ
ដើម្បីបន្សាបពាក្យចចាមអារ៉ាមទាំងឡាយ ដែលបានចោទថាអ្នកនាង
មានជំងឺមហារីកត្រង់កន្លែងកែកុន រឿងលាក់មុខសម្រាលកូនស្ងាត់ៗ
និងរឿងមានស្វាមីលួចលាក់ ទើបបោះបង់សិល្បៈជាដើម។ ក្រោយការប្រកាសនេះ
តែមួយខ្យល់ បណ្ដាស្ថានីយទូរទស្សន៍ និងក្រុមផលិករជាច្រើន
បានតម្រៀបជួរគ្នាទាក់ទងឲ្យអ្នកនាងចេញមុខឡើងឆាក និងទទួលសម្ដែង
ប៉ុន្តែទទួលផលអវិជ្ជទាំងអស់មកទល់ពេលនេះ។
ជាក់ស្ដែងក្នុងពេលអ្នកនាងឧស្សាហ៍ចេញមុខក្នុងមង្គលការក្នុង
កម្មវិធីជួបជុំតារា ក្រោយពីក្លាយជាម្ចាស់ហាងសាឡននៅម្ដុំប៊ូឌីង
និងក្រោយបើកភោជនីយដ្ឋានបែបបារាំងនៅម្ដុំមេភ្លើង
អ្នកណាក៏ដឹងដែរថា សន្ទុះនៃការទាក់ទងនោះ កាន់តែមានទំហំរីកធំ។
ការទទូចនោះ គឺដើម្បីឆ្លើយតប នឹងប្រជាប្រិយភាពរបស់អ្នកនាង
ដែលនៅតែមានទីផ្សារ និងនៅមានការចាប់អារម្មណ៍ក្នុងកម្រិតភាគច្រើន
ក្នុងស្រទាប់មហាជន។ ប៉ុន្តែរាល់ការទាក់ទង
អ្នកនាងមិនដែលឆ្លើយយល់ព្រមទេ ដោយប្រាប់ថា
ចាំបន្តិចទៀតសិនបែបនេះបែបនោះជាប្រចាំ ដោយម្ដងថា
ចាំទំនេរបន្តិចទៀត និងម្ដងថា ចាំសម្រករាងបានស្វែលដូចដើមសិន។
ការពន្យារប្រមាណអស់ជាង១ឆ្នាំតាំងពីបានប្រកាសនោះ
ត្រូវគេយល់ឃើញថា មិនខុសពីការស្ដោះហើយលេបវិញ
ដែលក្រុមអ្នកតាមដាន លើកឡើងថា នោះជាអ្វីដែលអ្នកនាងគ្រាន់តែនិយាយ
ហើយធ្វើមិនបាន។ ប្រឆាំងតបនឹងការលើកឡើងនេះ អ្នកនាងបានច្រានចោល
នឹងថាអ្វីដែលអ្នកនាងពោលឡើង ពិតជាមានថ្ងៃណាមួយ លេចឡើង។
អ្នកនាងវ៉ាង ស្រីណូ
បានបញ្ជាក់ក្នុងជំនួបលើកចុងក្រោយថា អ្នកនាងមិនលេបសម្ដីនោះទេ
ប៉ុន្តែមកពីអ្នកនាង មិនទាន់ត្រៀមខ្លួនបានរួចរាល់
ដើម្បីបង្ហាញមុខនៅក្នុងសិល្បៈប៉ុណ្ណោះ ទើបមកទល់ពេលនេះ
អ្វីៗនៅតែជាខ្យល់កើតឡើងមិនចេញ។ អ្នកនាងនៅតែអះអាងថា មិនចោលសិល្បៈ
និងគ្រោងបង្ហាញមុខឲ្យមានការភ្ញាក់ផ្អើលក្នុងពេលដ៏ខ្លី។ ទោះយ៉ាងណា
អ្នកនាងហាក់មិនហ៊ានទស្សន៍ទាយទាល់តែសោះថា ពេលដ៏ខ្លីដែលបានលើកឡើង
នឹងកើតឡើងឲ្យប្រាកដពេលណាឡើយ ខណៈដែលការលើកឡើងនេះ
ត្រូវមនុស្សភាគច្រើន
ចាត់ទុកថាទំនងនឹងគ្រាន់ជាខ្យល់ដែលគ្មានស្រមោលយូរអង្វែង។
នៅលើទំព័រ Facebook
អ្នកនាងបានបង្ហោះពីសកម្មភាពថ្មីៗនៃជីវិតហ៊ឺហារស្ទើរតែ
គ្រប់ពេលវេលា ទាំងការដើរលេង ការចូលហាង និងការធ្វើបុណ្យទាននានាដោយ
មិនខ្វល់ទាល់តែសោះពីកង្វល់ប្រាក់កាស ដូចដែលតារាភាគច្រើន
ដែលគ្មានទីផ្សារសិល្បៈព្រួយបារម្ភ។ អ្នកនាងធ្លាប់អះអាងថា
ហាងទាំងពីរនោះជាចំណែកមួយភាគធំរបស់គ្រួសារ
និងជាប្រាក់កាសមួយផ្នែកទៀត
ដែលនាងបានសន្សំពីការងារសិល្បៈក្នុងពេលច្រៀងរាំ
ប៉ុន្តែក្រុមគ្រួសាររបស់នាង ប្រគល់ហាងទាំងនោះឲ្យនាងគ្រប់គ្រង
ទើបគ្រប់បុគ្គលិកប្រចាំហាងទាំងមូល បានហៅអ្នកនាងថាអ្នកបងៗ
និងចាត់ទុកអ្នកនាងថាជាថៅកែស្រីតែម្នាក់។
ប្រភពពីតារាសិល្បៈនិយាយថា អ្នកនាង
វ៉ាង ស្រីណូ មិនអាចវិលវិញដូចការសន្យារបានទេ
ប៉ុន្តែអ្វីដែលអ្នកនាងលើកឡើង
អាចគ្រាន់តែដើម្បីបង្វែរការចាប់អារម្មណ៍
និងទុកការពារក្រែងថ្ងៃណាមួយ ចង់ហក់ប្រឡូកក្នុងសិល្បៈវិញ
គឺគ្មានការរិះគន់ពីសំណាក់មហាជនប៉ុណ្ណោះ។ យ៉ាងណាមិញ មហាជនភាគច្រើន
នៅតែចង់ឃើញតារាស្រីរូបនេះ លេចមុខក្នុងនាមជាតារាសម្ដែង
និងឡើងឆាកទូរទស្សន៍ដូចការសន្យារ
ដោយសារតែអ្នកនាងត្រូវគេចាត់ទុកថាជាជើងខ្លាំងម្នាក់
នៅមិនទាន់សាបឈ្មោះ ទោះជាមិនមានសកម្មភាពសិល្បៈថ្មីៗ មកទល់ពេលនេះ៕
ដោយ៖ វង្ស សុម៉ាលីន (VOD)
