នៅក្នុងសេចក្តីថ្លែងការណ៍រួមរបស់ មជ្ឈមណ្ឌលសិទ្ធិមនុស្សកម្ពុជា និង អង្គការការពារសិទ្ធិជនជាតិភាគតិច ចេញផ្សាយនៅថ្ងៃទី២០ ខែកុម្ភៈ បានឲ្យដឹងថា ការវាយសម្លាប់ជនជាតិវៀតណាម ក្នុងករណីគ្រោះថ្នាក់ចរាចរណ៍មួយនារាត្រី ថ្ងៃទី១៥ ខែកុម្ភៈ ត្រង់ចំណុចលើកំណាត់ផ្លូវជាតិលេខ២ សង្កាត់ចាក់អង្រែលើ ខណ្ឌមានជ័យ កើតឡើងដោយសារហ្វូងមហាជនបានស្រែកថាគាត់ជាជនជាតិវៀតណាម ទើបមានការវាយសម្លាប់លើជនជាតិវៀតណាមនោះ។ សេចក្តីថ្លែងការណ៍បន្តថា ស្រដៀងគ្នានេះដែរ មានឧប្បត្តិហេតុមួយបានកើតឡើងកាលពីថ្ងៃទី០៣ខែមករា មានហាងរបស់ជនជាតិវៀតណាមចំនួន ៣កន្លែង ត្រូវបានរងការវាយប្រហារ លួចប្លន់ និងដុតបំផ្លាញ បន្ទាប់ពីមានការប៉ះទង្គិចគ្នារវាងកម្មកររោងចក្រកាត់ដែរ និងកងរាជអាវុធហត្ថនៅផ្លូវវ៉េងស្រេងផងដែរ ដែលករណីទាំងពីរនេះ ត្រូវបានចាត់ទុកថាជាការវាយប្រហារដោយហេតុផលប្រកាន់ពូជសាសន៍។
នាយកនៃអង្គការការពារសិទ្ធិជនជាតិភាគតិច លោក អាង ច័ន្ទរិទ្ធ មានប្រសាសន៍ នៅព្រឹកថ្ងៃសុក្រនេះបន្ថែមលើសេចក្តីថ្លែងការណ៍ថា សេចក្តីថ្លែងការណ៍រួមនេះ គឺចង់ទាមទារឲ្យមានការស៊ើបអង្កេត ដោយយុត្តិធម៌ និងឯករាជ្យ ដើម្បីស្វែងរកការពិតលើករណីនៃការវាយសម្លាប់នេះ។
ទោះជាយ៉ាងណាក៏ដោយ លោក អាង ច័ន្ទរិទ្ធ ក៏បានបញ្ជាក់ដែរថា ការរើសអើងជាតិសាសន៍រហូតដល់មានការវាយសម្លាប់នៅកម្ពុជា ក៏ដូចជាការវាយសម្លាប់ខ្មែរកម្ពុជាក្រោម ពីសំណាក់រដ្ឋាភិបាលវៀតណាម សុទ្ធតែជាការរើសអើងជាតិសាសន៍ដូចគ្នា ដែលកន្លងមក លោកតែងតែចេញសេចក្តីថ្លែងការណ៍ថ្កោលទោសនូវទង្វើទាំងនេះ ព្រមទាំងអំពាវនាវកុំឲ្យមានអំពើទាំងនេះកើតឡើងតទៅទៀត។
ពាក់ព័ន្ធនឹងករណីនេះ អ្នកស្រាវជ្រាវពីការអភិវឌ្ឍន៍សង្គម លោក កែម ឡី យល់ថា ការលើកឡើងអង្គការទាំងពីរ ដែលថាការសម្លាប់ជនជាតិវៀតណាមលើទឹកដីខ្មែរ ជាអំពើហិង្សាដែលមានចរិតលក្ខណៈប្រកាន់ពូជសាសន៍ ជាការមិនត្រឹមត្រូវនោះទេ ព្រោះករណីនៃការវាយសម្លាប់ដោយសារគ្រោះថ្នាក់ចរាចរណ៍នេះ តែងតែកើតមាន មិនថាតែលើជនជាតិខ្មែរ ឬបរទេសឡើយ។ លោកបន្តថា អំពើហិង្សាបណ្តាលឲ្យជនជាតិវៀតណាមម្នាក់ស្លាប់ កើតឡើងដោយសារតែ អាកប្បកិរិយាមិនល្អ ខណៈដែលប្រជាជនបាត់ជំនឿលើការអនុវត្តច្បាប់របស់សមត្ថកិច្ចកម្ពុជា។
កាលពីថ្ងៃទី១៥ ខែកុម្ភៈ នេះ មន្ត្រីស្ថានទូតវៀតណាមក៏បានថ្កោលទោស ចំពោះសកម្មភាពនៃការវាយសម្លាប់ ថាជាការរើសអើងជាតិសាសន៍ ព្រមទាំងបានអំពាវនាវអាជ្ញាធរកម្ពុជាស៊ើបអង្កេត និងចាត់វិធានការណ៍ចាប់ជនដៃដល់ដាក់ទោសជាបន្ទាន់។
ពាក់ព័ន្ធនឹងករណីនេះដែរ អ្នកនាំពាក្យក្រសួងមហាផ្ទៃ លោក ខៀវ សុភ័គ លើកឡើងថា ប្រសិនជាការវាយសម្លាប់នោះកើតឡើងដោយសារការប្រើសម្តីថាវៀតណាមវាយ ខ្មែរមែននោះ គឺជាការរើសអើងជាតិសាសន៍មួយ ដែលប្រជាជនកម្ពុជាគួរតែជៀសវាងឲ្យបាន។ លោកបន្ថែមថា ឥលូវនេះខាងសមត្ថកិច្ចចាប់ខ្លួនជនសង្ស័យម្នាក់ ហើយក៏កំពុងធ្វើការស៊ើបអង្កេតបន្ត។
កាលពីថ្ងៃទី១៥ ខែកុម្ភៈ កន្លងទៅនេះ បុរសម្នាក់ត្រូវបានអាជ្ញាធរចាប់ខ្លួនដោយសង្ស័យថា បានប្រើពាក្យញុះញង់ប្រកាន់ជាតិសាសន៍ ដែលឈានដល់ការព្រួតគ្នាវាយលើជនជាតិវៀតណាមម្នាក់ស្លាប់ បន្ទាប់ពីករណីគ្រោះថ្នាក់ចរាចរណ៍មួយ កាលពីរាត្រីថ្ងៃទី១៥ ខែកុម្ភៈ លើកំណាត់ផ្លូវជាតិលេខ២ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ៕
ប្រភព (VOD) អត្ថបទដោយ : កាន់ វិច្ឆិកា
