ប្រទេសម៉ាឡេស៊ី ៖ បន្ទាប់ពីប៉ូលីសជំនាញរបស់ម៉ាឡេស៊ី បានបញ្ជាក់ថា បុរសដែលប្រើលិខិតឆ្លងដែនក្លែងក្លាយ មិនបានជាប់ទាក់ទង នឹងអំពើភេរវកម្មនោះ បានញ៉ាំងអោយមានសំណួរ កាន់តែឆ្ងល់ថែមទៀតថា តើយន្តហោះ ប៊ូអ៊ីង ៧៧៧-២០០ER ដែលដឹកមនុស្ស ២៣៩ នាក់ ដែលបាត់ការទាក់ទង តាំងពីព្រឹកថ្ងៃទី៨ ខែមីនា កន្លងមកនេះ កំពុងស្ថិតនៅទីណាពិតប្រាកដ ទន្ទឹមពេលដែលសាធារណជន បានបង្ហាញការយល់ឃើញខុសៗគ្នា ព្រោះទូរស័ព្ទរបស់ជនរងគ្រោះ ត្រូវបានសាច់ញាតិមួយចំនួន អះអាងថា នៅហៅចូលនៅឡើយ តែគ្មានអ្នកទទួល។
រដ្ឋាភិបាលប្រទេសចិន បានប្រកាសរួចហើយថា នឹងពង្រាយប្រព័ន្ធផ្កាយរណប អោយបានច្រើនរហូតដល់ ១០គ្រឿង ដើម្បីស្វែងរកយន្តហោះ ដឹកអ្នកដំណើរប្រទេស ម៉ាឡេស៊ី ដែលបាត់ការទាក់ទង រយៈពេល ៤ថ្ងៃកន្លងមកនេះ។ ប្រព័ន្ធផ្កាយរណបកម្រិតខ្ពស់នេះ ត្រូវគេនិយាយថា នឹងអាចពិនិត្យការធ្វើដំណើរ… អាកាសធាតុ… ការទាក់ទងគ្រប់វិស័យ… និងរាល់ផ្នែកគ្រប់សព្វ នៃការស្វែងរក ដើម្បីរកអោយឃើញ នូវយន្តហោះ ប៊ូអ៊ីង ៧៧៧-២០០ER ដែលដឹកមនុស្ស ២៣៩ នាក់ បាត់តាំងពីព្រឹកថ្ងៃទី៨ ខែមីនាកន្លងមក។
នាពេលនេះអាថ៌កំបាំង នៃការបាត់យន្តហោះប៊ូអ៊ីង ៧៧៧-២០០ER នៃក្រុមហ៊ុនអាកាសចរណ៍ ម៉ាឡេស៊ី កាន់តែមានភាពជ្រៅទៅៗ បន្ទាប់ពីសេចក្តីរាយការណ៍ ពីបន្ទប់ពិសោធន៍បញ្ជាក់ថា ដុំខ្លាញ់ប្រេង ២ដុំ ដែលប្រទះឃើញ នៅលើសមុទ្រ មិនមែនជាប្រេង ចេញពីយន្តហោះដែលបាត់នោះទេ។ វាគឺជាប្រេងធម្មតា ដែលកប៉ាល់បើកលើសមុទ្រ ធ្លាប់ប្រើតែប៉ុណ្ណោះ។ នៅទន្ទឹមនឹងនេះដែរ សេចក្តីរាយការណ៍ អំពីការឃើញបំណែកខ្លះ សង្ស័យថា ជារបស់យន្តហោះ នោះ ក៏មិនមែនជា ការពិតទៅទៀត។
សេចក្តីរាយការណ៍ បានអោយដឹងថា ប្រទេសចំនួន១២ បានសហការគ្នា តាមស្វែងរកយន្តហោះដែលបាត់ការទាក់ទង ហើយសហរដ្ឋអាមេរិក បានបញ្ជូននាវាពិឃាត មកជួយតាមរក ២គ្រឿង ព្រមទាំងយន្តហោះ ស៊ើបការណ៍ P-3C ORION មួយគ្រឿង ។ ក្រុមហ៊ុនអាកាសចរណ៍ ម៉ាឡេស៊ី ក្នុងសេចក្តីប្រកាសមួយ គូសបញ្ជាក់ថា ការខិតខំប្រឹងប្រែង តាមរុករកយន្តហោះ ដែលបាត់ដាននេះ ត្រូវបាន ពង្រីកហើយពេលនេះ ប្រមូលផ្តុំនៅឧបទ្វីប ភាគខាងលិចម៉ាឡេស៊ី ក្នុងច្រក សមុទ្រម៉ាឡាកា ៕
ប្រភព ដោយ : វត្តភ្នំ
