ប៉ូលិសម៉ាឡេស៊ី ចាប់ផ្តើមស៊ើបអង្កេត ផ្ទះអ្នកបញ្ជាយន្តហោះ បន្ទាប់ពីនាយករដ្ឋមន្ត្រីម៉ាឡេស៊ី បញ្ជាក់ថា យន្តហោះដែលបាត់កាលពីថ្ងៃសៅរ៍ សប្តាហ៍មុន បណ្តាលមកពីសកម្មភាពចេតនាណាមួយ។ក្នុងសន្និសីទសារ ព័ត៌មាននៅថ្ងៃសៅរ៍នេះ នាយករដ្ឋមន្ត្រីម៉ាឡេស៊ី លោក Najib Razak ថ្លែង ជាការចេញមុខលើកដំបូង ក្រោយការបាត់យន្តហោះថា ទិន្នន័យដែលត្រូវបានបញ្ជូនដោយយន្តហោះទៅផ្កាយរណប បានបញ្ជាក់ថា យន្តហោះបានផ្លាស់ប្តូរពីផ្លូវដើមរបស់វា។ លោកបន្ថែមថា ទំនាក់ទំនងផ្កាយរណបចុងក្រោយពីយន្តហោះ គឺនៅម៉ោង៨និង១១នាទីព្រឹក(ម៉ោងនៅម៉ាឡេស៊ី) ដែលលើសពេលកំណត់ដែលត្រូវទៅដល់ទីក្រុងប៉េកាំង។ យន្តហោះ បានចាកចេញពីទីក្រុង កូឡាឡាំពួរនៅម៉ោង ១២និង ៤១នាទី ទាបភ្លឺ។
នាយករដ្ឋមន្ត្រី និយាយថា ការប្លន់យន្តហោះ ត្រូវបានលើកឡើងជាលទ្ធភាព ហើយម៉ាឡេស៊ីនៅតែ ស៊ើបអង្កេតលើលទ្ធភាពទាំងអស់ ដើម្បីដឹងថាតើអ្វីបណ្តាល ឲ្យយន្តហោះMH370 ហោះខុសពីផ្លូវដើមរបស់វា។នាយករដ្ឋមន្ត្រីបញ្ជាក់ថា ប្រដាប់ទទួលទូរលេខ និងការទំនាក់ទំនង ត្រូវបានបិទដោយចេតនា មុនពេលវាទៅដល់សមុទ្រភាគខាងកើតនៃឧបទ្វីបម៉ាឡេស៊ី។
អាជ្ញាធរ ម៉ាឡេស៊ី បានផ្តោតការយកចិត្ត ទុកដាក់ទៅលើការស៊ើបអង្កេត លើសហសេវិកយន្តហោះ និងអ្នកធ្វើដំណើរនៅលើយន្តហោះ ។ បន្ទាប់ពីនាយករដ្ឋមន្ត្រីលើកឡើងបែបនេះ CNNរាយការណ៍ថា ប្រភពជិតនឹងក្រុមស៊ើបអង្កេតលើកឡើងថា ប៉ូលិសរបស់ម៉ាឡេស៊ី បានស្វែងរកផ្ទះរបស់អ្នកបញ្ជាយន្តហោះ លោក Zaharie Ahmad Shah អាយុ៥៣ឆ្នាំ ។
ការវិភាគចំណែកថ្នាក់នៃទិន្នន័យ អេឡិចត្រូនិក និងផ្កាយរណប លើកឡើងថា យន្តហោះម៉ាឡេស៊ី ដែលបាត់ខ្លួន ទំនងជាធ្លាក់ចូលឈូងសមុទ្រBengalនៃប្រទេសឥណ្ឌា ឬកន្លែងផ្សេងនៅក្នុងសមុទ្រឥណ្ឌា។ទូរទស្សន៍CNN ចុះផ្សាយថា ការវិភាគដែលត្រូវធ្វើឡើងដោយរដ្ឋាភិបាលអាមេរិក និងម៉ាឡេស៊ី បានបង្រួញតំបន់នៃការស្វែងរកយន្តហោះ ដែលបាត់អស់រយៈពេលមួយសប្តាហ៍មកហើយ។ការវិភាគ ត្រូវបានប្រើទិន្នន័យរ៉ាដា និងផ្កាយរណប ដោយគិតថា យន្តហោះម៉ាឡេស៊ី ដឹកអ្នកដំណើរ២៣៩នាក់ បានបង្វែរមកទិសខាងលិច កាត់តាមឧបទ្វីបMalayan ហើយបន្ទាប់មកហោះទៅទិសដៅពាយព្យ ឆ្ពោះទៅកាន់ ឈូងសមុទ្រBengal ឬភាគនិរតីនៃសមុទ្រឥណ្ឌា។
ការវិភាគនេះ កើតឡើងបន្ទាប់ពីសហរដ្ឋអាមេរិក បានបញ្ជាឲ្យនាវាអាមេរិកUSS Kidd ចូលទៅកាន់សមុទ្រឥណ្ឌា ហើយឥណ្ឌា ពង្រីកការប្រឹងប្រែងស្វែងរកទៅក្នុងឈូងសមុទ្រBengal។
យន្តហោះម៉ាឡេស៊ី ប្រភេទBoeing 777 (ជើងហោះហើរMH370) ដឹកអ្នកដំណើរចំនួន២២៧នាក់ និងអ្នកបម្រើលើយន្តហោះ ១២នាក់ (សរុប ២៣៩នាក់)។ យន្តហោះ បានចេញដំណើរពីទីក្រុងកូឡាឡាំពួ ប្រទេសម៉ាឡេស៊ី ទៅកាន់ទីក្រុងប៉េកាំងប្រទេសចិន កាលពីវេលាម៉ោងជាង១២យប់ថ្ងៃសៅរ៍ តែបានបាត់ការទំនាក់ទំនងពីរម៉ោងបន្ទាប់។
មន្ត្រីនិយាយថា យន្តហោះរបស់ម៉ាឡេស៊ី បានព្យាយាមត្រឡប់មកវិញ មុនពេលដែលយន្តហោះនោះ បាត់ការទាក់ទង។ អ្នកដំណើរនៅលើយន្តហោះនោះ មាន១៤ជាតិសាសន៍ ក្នុងនោះមានជនជាតិចិន ១៥៣នាក់ ជនជាតិម៉ាឡេស៊ី ៣៨នាក់ ជនជាតិឥណ្ឌូនេស៊ី ៧នាក់ អូស្ត្រាលី ៦នាក់ ឥណ្ឌា ៤នាក់ បារាំង៤នាក់ អាមេរិក៣នាក់ និងជនជាតិដទៃទៀត៕
ប្រភព និង អត្ថបទ ដោយ : ស៊ុន ណារិន (VOD)
