ប្រជាសហគមន៍មានជម្លោះដីធ្លីនៅរាជធានីភ្នំពេញ បានប៉ះទង្គិចជាមួយកម្លាំង ចម្រុះរបស់ខណ្ឌដូនពេញ និងសាលារាជធានីនៅក្បែរព្រះបរមរាជវាំង ខណៈពួកគេព្យាយាមហែក្បួនទៅកាន់តុលាការកំពូលទាមទារឲ្យដោះលែងអ្នកជាប់ឃុំ២១នាក់។
នៅព្រឹកនេះ ប្រជាសហគមន៍មានជម្លោះដីធ្លីរួមមាន បឹងកក់ បុរីកីឡា ថ្មគោល ជាដើមដែលមានគ្នាជាង១០០នាក់ បានហែក្បួនឆ្ពោះទៅកាន់តុលាការកំពូល តែត្រូវសកមត្ថកិច្ចចម្រុះរាប់រយនាក់ដាក់របាំងបិទនៅក្បែរ ដោយមិនប្រាប់ពីមូលហេតុ។
ពេលនោះកម្លាំងសន្តិសុខខណ្ឌដូនពេញនិង កម្លាំងរាជធានីភ្នំពេញបានរឹបអូសយកឧបករណ៍បំពងសំឡេង និង សម្ភារៈខ្លះតវ៉ាផ្សេងទៀត ពីប្រជាសហគមន៍។ ទោះយ៉ាងណា មិនមានអ្នករងរបួស ឬចាប់ខ្លួនក្នុងហេតុការណ៍នោះទេ។
បើទោះជា កម្លាំងថ្នាក់ក្រោមមិនបញ្ជាក់ពីមូលហេតុនៃការបិទផ្លូវ តែនៅព្រឹកនេះលោកនាយករដ្ឋមន្ត្រីហ៊ុនសែន និងភរិយារបស់លោក បានទៅចូលរួមទិវាវប្បធម៌ជាតិ នៅសាលចតុមុខ មានទីតាំងនៅក្បែរតុលាការកំពូល ហើយសន្តិសុខត្រូវបានរឹតបណ្តឹង។
ប្រជាសហគមន៍មានជម្លោះដីធ្លីប៉ះទង្គិចជាមួយកម្លាំងសន្តិសុខនៅក្បែរព្រះបរមរាជវាំង
ប្រភព និង អត្ថបទ ដោយ : ញឹម សុខន (VOD)
