មន្ត្រីជាន់ខ្ពស់ របស់រាជរដ្ឋាភិបាល នៅថ្ងៃសុក្រនេះ បង្ហាញជំហរស្ទាក់ស្ទើរ ពីការបើកទូលាយ សេរីភាពបញ្ចេញមតិ ខណៈមានក្រុមអង្គការសង្គមស៊ីវិល និងសហជីពច្រើនពាន់នាក់ ប្រកាសចូលរូមទិវាសិទ្ធិនារីអន្តរជាតិ នាថ្ងៃស្អែកនេះ។
អ្នកនាំពាក្យក្រសួងមហាផ្ទៃលោក ខៀវ សុភ័គ ឲ្យVODដឹងថា នៅថ្ងៃទី៨ មីនាស្អែកនេះ កម្លាំងសមត្ថកិច្ច នឹងដាក់ពង្រាយតាមគោលដៅ ក្នុងរាជធានីភ្នំពេញ ដូចពេលមុនៗ ដើម្បីការពារសណ្តាប់ធ្លាប់សាធារណៈ។
លោក ខៀវ សុភ័គ បន្តថា សម្រាប់លោកផ្ទាល់ មិនចង់ឲ្យ មានការប៉ះទង្គិចគ្នា ដោយហិង្សា រវាងសមត្ថកិច្ចនិងក្រុមអ្នកតវ៉ាឡើយ។ ប៉ុន្តែលោកមិនបញ្ជាក់ថាតើអាជ្ញាធរនឹងបើកទូលាយឲ្យអ្នកចូល រួមប្រារព្ធពិធីនេះដោយសន្តិវិធីឬក៏យ៉ាងណាទេ។
អ្នកនាំពាក្យអគ្គស្នងការនគរបាលជាតិ លោក គៀត ច័ន្ទថារិទ្ធ អះអាងថា នគរបាលជាតិនិងសហការជាមួយស្ថាប័នផ្សេងទៀត ដើម្បីការពារសណ្តាប់ធ្លាប់ឲ្យបានល្អ។ ប៉ុន្តែលោកមិនបញ្ជាក់ថា នឹងមានការបង្ក្រាបលើអ្នកចូលរួមប្រារព្ធពិធីនោះ ឬទេ បើសិនពួកគេនៅតែបន្តសកម្មភាពតាមការគ្រោងទុក។
មន្ត្រីឃ្លាំមើលការរំលោភសិទ្ធិមនុស្សនៅអង្គការលីកាដូ លោក អំ សំអាត មានប្រសាសន៍ថា បើមានហិង្សាបណ្តាលឲ្យពលរដ្ឋរងគ្រោះ នោះរដ្ឋាភិបាលនឹងរងការរិះគន់ថារំលោភសិទ្ធិមនុស្ស។ ប៉ុន្តែលោកយល់ថា ករណីនេះរដ្ឋាភិបាល ធ្វើយ៉ាងបង្ហាញថា សេរីភាបបញ្ចេញមតិ ដោយសន្តិវិធីត្រូវធានាដូចអ្វីដែលមានចែងនៅក្នុងច្បាប់។
ក្រុមអង្គការសង្គមស៊ីវិល និងសហជីព ប្រកាសចូលរួមប្រារព្ធទិវាសិទ្ធិនារីអន្តរជាតិ លើកទី១០៣ដែលធ្វើឡើងនៅថ្ងៃសៅរ៍ស្អែកនេះ ដោយមានអ្នកចូលរួមប្រមាណជា៣ម៉ឺននាក់។សាលារាជធានីភ្នំពេញ និងក្រសួងមហាផ្ទៃ បានច្រានចោល សំណើជួបជុំនៅទីលានប្រជាធិបតេយ្យ ដោយសំអាងហេតុផលថា ធ្វើឲ្យប៉ះពាល់ដល់សន្តិសុខ និងសណ្តាប់ធ្លាប់សង្គម៕
រដ្ឋាភិបាល ស្ទាក់ស្ទើរទប់ស្កាត់ក្រុមអ្នកចូលរួមប្រារព្ធ ទិវាសិទ្ធិនារីអន្តរជាតិ៨មីនា
ប្រភព និង អត្ថបទ ដោយ : ញឹម សុខន (VOD)
