ក្មេងប្រុសអាយុ១១ឆ្នាំម្នាក់ ដែលរស់នៅខេត្តកំពង់ឆ្នាំង បានស្លាប់ដោយសារជំងឺ ផ្តាសាយបក្សី កាលពីព្រឹកថ្ងៃសុក្រ ដែលជាករណីទីពីរហើយ សម្រាប់ខែមីនានេះ និងជាករណីទី៧ សម្រាប់ឆ្នាំ២០១៤។
បើតាមអនុប្រធានមន្ទីរពេទ្យគន្ធបុប្ផា លោកវេជ្ជបណ្ឌិត Laurent Denis មានប្រសាសន៍ប្រាប់ ទីភ្នាក់ងារសារព័ត៌មាន AFP ថាក្មេងប្រុសអាយុ១១ឆ្នាំ ដែលមកពីខេត្តកំពង់ឆ្នាំង បានស្លាប់ដោយសារជំងឺផ្តាសាយបក្សី កាលពីព្រឹកថ្ងៃសុក្រ បន្ទាប់ពីក្រុមគ្រួសាររបស់គេបញ្ជូនទៅកាន់មន្ទីរពេទ្យគន្ធបុប្ផា ក្នុងរាជធានីភ្នំពេញ។
លោកបន្តថា រូបលោក រួមនឹងវេជ្ជបណ្ឌិតផ្សេងទៀត បានព្យាយាមដើម្បីជួយសង្គ្រោះជីវិតរបស់ក្មេងប្រុសម្នាក់នោះ តែវាយឺតពេលណាស់ទៅហើយ។
វេជ្ជបណ្ឌិតមួយរូបទៀត បានឱ្យដឹងថា ក្មេងប្រុសម្នាក់នោះបានបរិភោគសាច់មាន់ដែលមានមេរោគគ្រុនផ្តាសាយបក្សី H5N1។ ចំណែកក្មេងប្រុសម្នាក់ទៀតមានអាយុ ៨ឆ្នាំ កំពុងស្ថិតក្នុងស្ថានភាពធម្មតា នៅក្នុងមន្ទីរពេទ្យមួយ នៅរាជធានី ភ្នំពេញបន្ទាប់ពីការធ្វើតេស្ត បញ្ជាក់ថាកុមារនោះបានឆ្លងជំងឺគ្រុនផ្តាសាយបក្សី H5N1 ។
កាលពីថ្ងៃទី០២ ខែមីនា កុមារាម្នាក់អាយុ ៣ឆ្នាំ ដែលរស់នៅសង្កាត់ចោមចៅ ខ័ណ្ឌពោធិ៍សែនជ័យ រាជធានីភ្នំពេញ ត្រូវបានវិទ្យាស្ថានប៉ាស្ទ័រកម្ពុជា បញ្ជាក់ថា បានស្លាប់ដោយសារជំងឺផ្តាសាយបក្សីនេះដែរ។
ជំងឺគ្រុនផ្តាសាយបក្សី H5N1 ជាធម្មតាឆ្លងរាលដាលពីបក្សីទៅមនុស្ស តាមរយៈការទំនាក់ទំនងដោយផ្ទាល់។ ប៉ុន្តែអ្នកជំនាញបារម្ភថា វាអាចប្រែប្រួលទៅជាទម្រង់ ឆ្លងយ៉ាងងាយទៅកាន់មនុស្ស ដែលអាចឈានទៅដល់ការរាតត្បាតជំងឺនេះទូទាំងប្រទេស ឬពិភពលោក។
ការស្លាប់របស់កុមារានៅខេត្តកំពង់ឆ្នាំងនេះ ជាករណីទី៥៤ នៃជំងឺផ្តាសាយបក្សីនៅប្រទេសកម្ពុជា ហើយ៤០ករណីក្នុងចំណោមនោះ កើតឡើងលើកុមារអាយុក្រោម១៤ឆ្នាំ និង២៩ករណីក្នុងចំណោម៥៣ករណី កើតលើនារី។
១៨ករណីក្នុងចំណោម៥៣ករណី អ្នកជំងឺនៅមានជីវិត ហើយកាលពីឆ្នាំមុនមានអ្នកស្លាប់ចំនួន១៤នាក់ ដែលភាគច្រើនជាកុមារ ដោយសារពួកគេរស់នៅ និងលេងជាមួយបក្សី៕
ក្មេងប្រុសម្នាក់ទៀតរស់នៅខេត្តកំពង់ឆ្នាំងស្លាប់ដោយសារជំងឺផ្តាសាយបក្សី
ប្រភព និង អត្ថបទ ដោយ : កាន់ វិច្ឆិកា (VOD)
