មន្ត្រីអង្គការសង្គមស៊ីវិល និងអ្នកវិភាគ លើកឡើងថា ការធ្វើកំណែទម្រង់គណៈកម្មាធិការជាតិរៀបចំការបោះឆ្នោត (គ.ជ.ប) ត្រូវធ្វើឡើងដោយមានការចូលរួមពីគ្រប់សមាសភាពដែលពាក់ព័ន្ធ រួមទាំងអង្គការសង្គមស៊ីវិល ដើម្បីធានាដល់ភាពត្រឹមត្រូវ និងតម្លាភាពនៃការបោះឆ្នោត។
នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវ(និចហ្វិច) លោក ហង្ស ពុទ្ធា មានប្រសាសន៍ថា ជាបទពិសោធន៍នាពេលកន្លងមក ការងារ និងទំនួលខុសត្រូវរបស់ គ.ជ.ប បានរងការរិះគន់ខ្លាំងពីសំណាក់ប្រជាពលរដ្ឋ និងគណបក្សប្រឆាំង ថាមានភាពមិនប្រក្រតី និងមិនត្រឹមត្រូវដែលតម្រូវឲ្យមានការធ្វើកំណែទម្រង់សមាសភាពរបស់ស្ថាប័នមួយនេះ។
លោកថា ដើម្បីធានាពីភាពស្មើគ្នានៃការបោះឆ្នោត គ.ជ.ប ត្រូវធ្វើកំណែទម្រង់ ដោយដាក់បញ្ចូលសមាសភាពរបស់មន្ត្រីអង្គការសង្គមស៊ីវិល ឬភាគីគណបក្សធំៗទាំង២ ដាក់បញ្ចូលតំណាងរបស់ខ្លួនទៅក្នុងស្ថាប័ននេះ។
អ្នកស្រាវជ្រាវសង្គម លោក បណ្ឌិត កែម ឡី មានប្រសាសន៍ថា ការផ្លាស់ប្តូរសមាសភាព គ.ជ.ប ត្រូវផ្លាស់ប្តូរ តាំងពីថ្នាក់ប្រធាន គ.ជ.ប នៅតាមបណ្តាខេត្ត និងអគ្គលេខាធិការរងឡើងទៅ ដើម្បីធានាឲ្យមានតម្លាភាព ព្រោះថាថ្នាក់ដឹកនាំ គ.ជ.ប សព្វថ្ងៃនេះ មាននិន្នាការទៅខាងគណបក្សកាន់អំណាច។
ទាក់ទងនឹងបញ្ហានេះ អគ្គលេខាធិការ គ.ជ.ប លោក ទេព នីថា លើកឡើងថា លោកមិនមានយោបល់ក្នុងការផ្លាស់ប្តូរនេះទេ តែប្រសិនជាច្បាប់កំណត់ថា គ.ជ.ប ត្រូវតែផ្លាស់ប្តូរ នោះត្រូវតែធ្វើការផ្លាស់ប្តូរ។
របាយការណ៍ដែលចេញផ្សាយប្រចាំឆ្នាំ២០១២ របស់អ្នករាយការណ៍ពិសេសនៃស្ថានភាពសិទ្ធិមនុស្សនៅកម្ពុជា លោក សូរិយា ស៊ូប៊ែរឌី ក៏បានសរសេរជាអនុសាសន៍មួយចំនួន ដែលក្នុងនោះ ស្នើឲ្យ គ.ជ.ប ធ្វើការកែទម្រង់ ដើម្បីឲ្យមានភាពឯករាជ្យ និងស្វ័យភាព ការកំណត់អាណត្តិជាក់លាក់ក្នុងការតែងតាំង ប្រធាន និងសមាជិក គ.ជ.ប ការប្រើប្រាស់ប្រព័ន្ធផ្សព្វផ្សាយឲ្យមានភាពយុត្តិធម៌ និងស្មើភាពគ្នាក្នុងយុទ្ធនាការផ្សព្វផ្សាយការបោះឆ្នោត ការធ្វើអត្តសញ្ញាណប័ណ្ណឲ្យបានត្រឹមត្រូវ និងការធ្វើវិសោធនកម្មច្បាប់ ដែលតម្រូវឲ្យមនុស្សម្នាក់ត្រូវបានតែងតាំងឲ្យឈរឈ្មោះបោះឆ្នោត ដោយគណបក្សនយោបាយមួយ ដើម្បីផ្តល់លទ្ធភាពដល់នបេក្ខជឯករាជ្យដទៃទៀត ឈរឈ្មោះបោះឆ្នោតថ្នាក់ជាតិ ជាដើម។
បើតាមមន្ត្រី គ.ជ.ប សមាសភាពរបស់ គ.ជ.ប នៅរាជធានីភ្នំពេញ (NEC) មានចំនួន២៦១រូប ក្នុងនោះ១១រូប ជាប្រធាន សមាជិក អគ្គលេខាធិការ និងអគ្គលេខាធិការរង។ ចំណែក គ.ជ.ប នៅតាមបណ្តាខេត្ត (PEC) មានចំនួនបុគ្គលិកសរុបចំនួន២២៥រូប ដែលក្នុង១ខេត្តមានចំនួនបុគ្គលិក ៩នាក់ ដែលសមាភាព គ.ជ.ប ភាគច្រើន មកពីគណបក្សកាន់អំណាច៕
សង្គមស៊ីវិល៖ ការធ្វើកំណែទម្រង់ គ.ជ.ប ត្រូវមានការចូលរួមពីគ្រប់សមាសភាពពាក់ព័ន្ធដើម្បីតម្លាភាព
ប្រភព និង អត្ថបទ ដោយ : កាន់ វិច្ឆិកា (VOD)
