ថ្នាក់ដឹកនាំគណបក្សសង្គ្រោះជាតិ បានទៅទីលានប្រជាធិបតេយ្យរយៈពេលខ្លី ដើម្បីគាំទ្រការទាមទាររបស់កម្មករលើបញ្ហាប្រាក់ឈ្នួល និងថ្កោលទោសអាជ្ញាធររាជធានីភ្នំពេញ ដែលរារាំងមិនឲ្យកម្មករធ្វើវេទិកាសាធារណៈស្តីពីសិទ្ធិការងារ។
នៅម៉ោង ១០:៣០នាទីព្រឹកថ្ងៃសៅរ៍នេះ លោកសម រង្ស៊ី ប្រធាន និងលោក កឹម សុខា អនុប្រធានគណបក្សសង្គ្រោះជាតិ បានទៅកាន់សួនច្បារក្បែរស្ពាននាគ មុខទីលានប្រជាធិបតេយ្យ ប្រមាណ ៥នាទី ហើយបានចាកចេញទៅវិញ ដោយបានថ្លែងសារគាំទ្រកម្មករ ចំពោះការទាមទារដំឡើងប្រាក់ឈ្នួល ១៦០ដុល្លារក្នុងមួយខែ និងលក្ខខណ្ឌការងារសមរម្យ ព្រមទាំងទាមទារឲ្យមានការដោះលែងអ្នកជាប់ឃុំទាំង២១នាក់។
ជាមួយគ្នានោះដែរ លោកសម រង្ស៊ី ក៏បានថ្កោលទោសអាជ្ញាធររាជធានីភ្នំពេញ ដែលបានរារាំង មិនឲ្យសហព័ន្ធសហជីពទាំង១៨ ធ្វើវេទិកាសាធារណៈនៅទីលានប្រជាធិបតេយ្យ ដើម្បីឲ្យស្ត្រី និងកម្មករិនី ចូលរួមសម្តែងមតិនៅថ្ងៃសិទ្ធិនារីអន្តរជាតិ៨មីនានេះ។
នៅម៉ោងជាង១០ព្រឹកនេះដែរ គេសង្កេតឃើញមានការដាក់បន្ថែមកម្លាំងសមត្ថកិច្ចជាច្រើនឡាន នៅទីលានប្រជាធិបតេយ្យផងដែរ។
ថ្នាក់ដឹកនាំសហព័ន្ធសហជីពទាំង១៨ គ្រោងធ្វើវេទិកាសាធារណៈទាក់ទងនឹងសិទ្ធិការងារនេះ នៅថ្ងៃទិវាសិទ្ធិនារីអន្តរជាតិ៨មីនា នៅទីលានប្រជាធិបតេយ្យ ប៉ុន្តែត្រូវអាជ្ញាធររាជធានីភ្នំពេញរាប់សិបនាក់ ដាក់រនាំងដែកបិទច្រកចេញចូលទៅកាន់ទីនោះ និងមានការប៉ះទង្គិចគ្នាមួយប្រាវ។ តែទោះជាយ៉ាងណា ក្រុមសហជីព និងកម្មករ បាននាំគ្នារៀបចំវេទិកាសាធារណៈនេះ នៅសួនច្បារខាងមុខទីលានប្រជាធិបតេយ្យវិញ៕
ដោយ៖ តាំង វីដា (VOD)
