មន្ត្រីសាលារាជធានីភ្នំពេញ បានទៅទទួលយកញត្តិរបស់អ្នកមានជម្លោះដីធ្លីទាំង២១សហគមន៍ នៅតំបន់បឹងកក់ផ្ទាល់ បន្ទាប់ពីសមត្ថកិច្ចរារាំងប្រជាសហគមន៍ទាំងនោះ មិនឲ្យហែក្បួនទៅកាន់ក្រសួងកិច្ចការនារី នៅថ្ងៃសិទ្ធិនារីអន្តរជាតិនេះ។
កញ្ញា សុង ស្រីលាប ប្រជាសហគមន៍បឹងកក់ បានឲ្យ VOD ដឹងថា បន្ទាប់ពីមានការរារាំងអ្នកមានជម្លោះដីធ្លីទាំង២១សហគមន៍ មិនឲ្យដើរហែក្បួន អាជ្ញាធរបានចរចាជាមួយពួកគាត់ ដោយស្នើឲ្យតំណាងសហគមន៍ដីធ្លី ប្រមាណ១០នាក់ ធ្វើដំណើរតាមម៉ូតូកង់បី ដើម្បីទៅដាក់ញត្តិនៅក្រសួងកិច្ចការនារី ប៉ុន្តែក្រោយមក នៅម៉ោងប្រមាណ ១០ព្រឹក មន្ត្រីសាលារាជធានីភ្នំពេញ បានទៅកាន់តំបន់បឹងកក់ដោយផ្ទាល់ ដើម្បីទទួលញត្តិរបស់ពួកគាត់វិញ។
កញ្ញាបន្តថា នៅពេលនេះ អ្នកមានជម្លោះដីធ្លីទាំង២១សហគមន៍ និងព្រះសង្ឃ បាននឹងកំពុងធ្វើវេទិកាសាធារណៈមួយនៅតំបន់បឹងកក់ ដោយមានការថ្លែងសារពីទុក្ខលំបាករបស់ក្រុមគ្រួសាររងគ្រោះ ដោយសារការបណ្តេញចេញ។
ដោយឡែក ញត្តិដែលដាក់ទៅក្រសួងកិច្ចការនារី និងសាលារាជធានីភ្នំពេញនោះ គឺមានខ្លឹមសារជំរុញឲ្យដោះលែងមនុស្ស២១នាក់ ដែលកំពុងឃុំខ្លួននៅពន្ធនាគារ ត្រពាំងផ្លុង ខេត្តកំពង់ចាម និងបញ្ឈប់ប្រើហិង្សាលើស្ត្រី និងកុមារ បញ្ឈប់បណ្តេញចេញ ផ្តល់សំណងដល់អ្នករងគ្រោះ និងគោរពសិទ្ធិមនុស្សជាដើម៕
ដោយ៖ ញឹម សុខន(VOD)
