សហព័ន្ធសហជីព និងសមាគមទាំង១៨ បានសម្រេចយកសួនច្បារមុខទីលានប្រជាធិបតេយ្យ ដើម្បីរៀបចំវេទិកាសាធារណៈស្តីពីសិទ្ធិការងារ នៅម៉ោងជិត ១០ព្រឹកនេះ បន្ទាប់ពីអាជ្ញាធររាជធានីភ្នំពេញ បិទច្រកចេញចូលទីលានប្រជាធិបតេយ្យ និងមានការប៉ះទង្គិចគ្នាមួយប្រាវមក។
វេទិកាសាធារណៈ ចាប់ផ្តើមដោយមានការថ្លែងសារទាក់ទងនឹងសិទ្ធិនារីអន្តរជាតិ ការទាមទារឲ្យដោះលែងអ្នកជាប់ឃុំទាំង២១នាក់ និងផ្តល់ឱកាសដល់កម្មការិនីរោងចក្រ ឡើងថ្លែងពីទុក្ខលំបាករបស់ពួកគេ នៅពេលបំពេញការងារ ព្រមទាំងការទាមទារឲ្យដំឡើងប្រាក់ឈ្នួលដល់កម្មករចំនួន ១៦០ដុល្លារក្នុងមួយខែ។
វេទិកានេះ ធ្វើឡើងដោយមានការចូលរួមពីប្រជាពលរដ្ឋ កម្មករកម្មការិនី សហជីព អង្គការសង្គមស៊ិវិល អតីតក្រុមការងារគណបក្សសមរង្ស៊ី ប្រមាណជាង៥០០នាក់។
នៅមុនពេលធ្វើវេទិកាសាធារណៈ កម្មករ និងកម្លាំងសន្តិសុខ បានប្រឈមមុខដាក់គ្នា ដោយពាក្យសម្តី និងគប់ដបទឹកសុទ្ធដាក់គ្នាទៅវិញទៅមក បន្ទាប់ពីកម្លាំងសមត្ថកិច្ចរារាំងក្រុមកម្មករចូលទៅកាន់ទីលានប្រជាធិបតេយ្យ។ ក្រុមសន្តិសុខ ក៏បានដេញវាយកម្មករមួយចំនួនផងដែរ ប៉ុន្តែនៅម៉ោងជាង ៩ព្រឹកនេះ ក្រុមកម្មករ និងប្រជាពលរដ្ឋ បានបណ្តេញក្រុមសន្តិសុខសាលាខណ្ឌដូនពេញ ដែលព្យាយាមបំបែក និងរារាំងក្រុមកម្មករ មិនឲ្យប្រមូលផ្តុំនៅសួនច្បារខាងមុខទីលានប្រជាធីបតេយ្យនោះចេញ ហើយពួកគេក៏ចាប់ផ្តើមធ្វើវេទិកាសាធារណៈនៅលើសួនច្បារនោះ។
វេទិកាសាធារណៈនៅថ្ងៃទិវាសិទ្ធិនារីអន្តរជាតិនេះ ធ្វើឡើងក្នុងគោលបំណងទាមទារឲ្យរដ្ឋាភិបាល និងនិយោជកដោះស្រាយបញ្ហាចំនួន៧ចំណុច ក្នុងនោះមាន ១,សុំឲ្យដោះលែងជនជាប់ចោទទាំង២១នាក់ និងទម្លាក់ចោលរាល់ការចោទប្រកាន់ទាំងអស់លើអ្នកទាំង២៣នាក់ ២,សុំឲ្យមានការចរចាឡើងវិញលើប្រាក់ឈ្នួលគោល១៦០ដុល្លារក្នុងមួយខែ ៣,ត្រូវដាក់ទោសដល់ជនល្មើសដែលបានប្រើហិង្សានិងសម្លាប់កម្មករ ព្រមទាំងផ្តល់សំណងជំងឺចិត្តដល់ជនរងគ្រោះ ដែលបានបាត់បង់ជីវិត រងរបួស និងជាប់ឃុំឃាំង ៤,រដ្ឋាភិបាលត្រូវដកបម្រាមនៃការជួបជុំជាសាធារណៈរបស់ប្រជាពលរដ្ឋ ចេញ វិញ និងលុបចោលការព្យួរការចុះបញ្ជីការអង្គការវិជ្ជាជីវៈពីក្រសួងការងារ ៥,តំណាងក្រុមហ៊ុនទាំងអស់ត្រូវដកបណ្តឹងដែលប្រឆាំងសហជីព និងកម្មករនិយោជិត ៦,សុំទទួលយកកម្មករដែលត្រូវបញ្ឈប់ពីការងារឲ្យចូលធ្វើការវិញ ព្រមទាំងផ្តល់ប្រាក់រម្លឹក និងអត្ថប្រយោជន៍ផ្សេងៗ និងចំនុចទី៧ ត្រូវទូទាត់ប្រាក់ឈ្នួល និងប្រាក់រង្វាន់ទៀងទាត់ជូនដល់កម្មករ ដែលនិយោជកបានកាត់ ក្នុងអំឡុងពេលធ្វើកូដកម្ម៕
ដោយ៖ តាំង វីដា (VOD)
