មជ្ឈមណ្ឌលសិទ្ធិមនុស្សកម្ពុជា (CCHR) អំពាវនាវឲ្យបណ្តាញស្ថានីយ៍ទូរទស្សន៍ទាំងអស់ បញ្ឈប់ការចាក់ផ្សាយស្ប៉តពាណិជ្ជកម្ម Cellcard និងរាល់ការ សម្ដែងមានលក្ខណៈ រើសអើងមនុស្ស
ភេទទីបី។
ការអំពាវនាវនេះ បានធ្វើឡើង ខណៈដែលក្រុមហ៊ុនប្រព័ន្ធទូរស័ព្ទម៉ូប៊ីថែល (Mobitel) បានផលិត និងចាក់ផ្សាយស្ប៉តពាណិជ្ជកម្មមួយ នៅលើកញ្ចក់ទូរទស្សន៍កម្ពុជា រយៈពេល៦០វិនាទី ដោយបង្ហាញពីអតិថិជនពីរនាក់ ប្រើប្រព័ន្ធទូរស័ព្ទខុសគ្នា គឺ Cellcard និងប្រព័ន្ធផ្សេងមួយទៀត។
ស្ប៉តពាណិជ្ជកម្មនោះ បានលើកឡើងពី អតិថិជនម្នាក់ដែលប្រើប្រាស់ប្រព័ន្ធទូរស័ព្ទផ្សេងពី Cellcard បានខកចិត្ត នៅពេលដែលខ្លួនណាត់ជួបមនុស្សស្រីដែលខ្លួនស្គាល់តាមទូរស័ព្ទជាលើកដំបូង តែផ្ទុយទៅវិញ នារីម្នាក់នោះមនុស្សភេទទីបី។ ចំណែកបុរសម្នាក់ផ្សេងទៀត ដែលប្រើប្រព័ន្ធCellcard បាននិយាយថា «ខ្ញុំប្រើប្រព័ន្ធ Cellcard ! ដូច្នេះ ខ្ញុំមិនទទួលបានលទ្ធផលខកចិត្តដូចនេះទេ» ។
ក្នុងន័យនេះ អ្នកសម្របសម្រួលគម្រោងការតម្រង់ទិស និងគម្រោងយេនឌ័ររបស់មជ្ឈមណ្ឌលសិទ្ធិមនុស្សកម្ពុជាលោក នួន ស៊ីដារ៉ា យល់ឃើញថា ស្ប៉តពាណិជ្ជកម្មនេះ បង្ហាញពីសកម្មភាពរើសអើងភេទ។ លោកស្នើដល់អ្នកផលិតកម្មវិធីស្ប៉តពាណិជ្ជកម្មលើកញ្ចក់ទូរទស្សន៍ និងកម្មវិធីផ្សេងៗ ជៀសវាងរាល់ការសម្ដែងប៉ះពាល់ដល់សិទ្ធិសេរីភាពមនុស្សភេទទីបី។
បើតាមលោក នួន ស៊ីដារ៉ា មជ្ឈមណ្ឌលសិទ្ធិមនុស្សកម្ពុជា ក៏បានផ្ញើលិខិតជូនលោក គិត ម៉េង អគ្គនាយកក្រុមហ៊ុន Mobitel ស្នើឲ្យបញ្ឈប់ការចាក់ផ្សាយស្ប៉តពាណិជ្ជកម្ម ដែលបង្ហាញពីការរើសអើង និងការខកចិត្តចំពោះមនុស្សភេទទីបីនេះ៕
ប្រភព និង អត្ថបទ ដោយ សុទ្ធ គឹមសឿន (VOD)
