ស្ត្រីអតីតអ្នកបឹងកក់៣នាក់ ត្រូវបានដោះលែងវិញហើយនៅរសៀលថ្ងៃពុធនេះ បន្ទាប់ពីត្រូវបានចាប់ខ្លួន និងឃុំខ្លួនអស់មួយព្រឹក។
ប្រជាសហគមន៍អតីតអ្នកបឹងកក់ជាង១០នាក់ បានប្រមូលផ្តុំនៅខាងមុខសាលារាជធានីភ្នំពេញ ដើម្បីសុំឲ្យមានដំណោះស្រាយរឿងដីធ្លី។អ្នកស្រី ស៊ា ណារ៉េត អាយុ៥៦ឆ្នាំ ដែលត្រូវបានចាប់ខ្លួន មានប្រសាសន៍ពីលើរថយន្តថា អ្នកស្រី និងស្ត្រី២នាក់ទៀត ត្រូវបានចាប់ខ្លួននៅម៉ោងជាង៨ព្រឹក និងកំពុងត្រូវបានបញ្ជូនទៅស្នងការដ្ឋាននគរបាលរាជធានីភ្នំពេញ។ អ្នកស្រីបន្តថា អ្នកស្រីមិនបានធ្វើសកម្មភាពអ្វីទេ តែសមត្ថកិច្ចបានចាប់ខ្លួនពួកគាត់។ឧគ្ឃោសនស័ព្ទមួយរបស់ប្រជា សហគមន៍ ត្រូវបានសមត្ថកិច្ច ចាប់យកពេលពួកគាត់តវ៉ា។
លោក ចាន់ សុវ៉េត មន្ដ្រីស៊ើបអង្កេតសមាគមសិទ្ធិមនុស្សអាដហុក មានប្រសាសន៍ថា អ្នកទាំងបីនាក់ ត្រូវបានដោះលែងវិញហើយនៅម៉ោងជាង១២រសៀល។
អតីតអ្នកបឹកកក់ សង្កាត់ស្រះចក ខណ្ឌដូនពេញ រាជធានីភ្នំពេញ ទទួលបានសំណង ៨ពាន់ដុល្លារ និង២លានរៀល ជាសំណងដែលប្រជាពលរដ្ឋអតីតបឹងកក់ ព្រមទទួលយកដោយបង្ខំចិត្ត ក្រោយពេល ក្រុមហ៊ុនបូមខ្សាច់ពន្លិចផ្ទះសម្បែងពួកគាត់ ក្នុងតំបន់អភិវឌ្ឍន៍បឹងកក់៕
ស្ត្រីអតីតបឹងកក់៣នាក់ ត្រូវបានដោះលែងវិញហើយ
ប្រភព និង អត្ថបទ ដោយ : ស៊ុន ណារិន (VOD)
