ប្រជាពលរដ្ឋ និងអ្នកនាំភ្ញៀវទេសចរមួយចំនួន នៅខេត្ដសៀមរាប ប្រតិកម្មនឹងអាជ្ញាធរខេត្ដ ដែលកាប់ ដើមឈើក្នុងតំបន់ទេសចរណ៍ប្រតិសាស្ដ្រ ធ្វើឲ្យបាត់បង់សោភ័ណភាពព្រៃឈើនៅតំបន់ប្រាសាទបុរាណ។
មគ្គុទេសក៍ទេសចរភាសាជប៉ុន នៅសៀមរាប លោក ព្រហ្ម សុវណ្ណ ឲ្យ VODដឹងនៅព្រឹកថ្ងៃអង្គារនេះថា ដើមឈើទាល និងដើមគគី ដែលមានអាយុកាលច្រើនឆ្នាំជាច្រើនដើម នៅតាមដងផ្លូវក្នុងក្រុងទេសចរបុរាណ ត្រូវបានអាជ្ញាធរខេត្ដកាប់បំផ្លាញចោល ដើម្បីពង្រីកផ្លូវ។ លោកបន្ដថា ដើមឈើវ័យចំណាស់ទាំងនោះ មានភាពទាក់ទាញទេសចរ និងសម្រាប់លម្អសោភ័ណប្រាសាទបុរាណ ។ លោករិះគន់ថា អាជ្ញាធរមិនគួរកាប់បំផ្លាញដើមឈើដែលនៅតាមដងផ្លូវនោះទេ ព្រោះមិនប៉ះពាល់ដល់ ការធ្វើចរាចរឡើយ។
ពលរដ្ឋមួយរូបទៀត ដែលសុំមិនបញ្ចេញឈ្មោះ ឲ្យដឹងថា ដើមឈើមានតម្លៃចំនួន១៣ដើម ដែលអាជ្ញាធរបំផ្លាញ អាចទំនងប៉ះពាល់ដល់សណ្ឋាគារ ឈ្មោះសុខាអង្គរនៅក្បែនោះ។ លោកបន្ដថា ដើមឈើមានតម្លៃជាច្រើនដើម ជាពិសេសដើមឈើក្រញូង ដែលដុះនៅតាមដងផ្លូវ ក្នុងតំបន់ទេសចរកំពុងប្រឈមនឹងការកាប់បំផ្លាញ ក្រោមហេតុផលពង្រីកផ្លូវ។ លោកថា អាជ្ញាធរ គួរថែរក្សានិងអភិរក្សទុកដើមឈើ ដើម្បីលម្អក្នុងតំបន់ទេសចរ ប្រវត្ដិសាស្ដ្រ ខណៈព្រៃឈើនៅកម្ពុជា កំពុងរងការហិនហោច។
VOD មិនអាចទាក់ទងអភិបាលខេត្ដសៀមរាប លោក ឃឹម ប៊ុនសុង និងអ្នកនាំពាក្យ លោក ប៊ុន ថាឬទ្ធិ ដើម្បីបំភ្លឺពីករណីនេះ បាននៅឡើយទេ។ ប៉ុន្ដែអភិបាលស្ដីទី ក្រុងសៀមរាប លោក ស៊ូ ប្លាតុង មានប្រសាសន៍ថា ការកាប់ដើមឈើនោះ ដើម្បីយកទីតាំងពង្រីកផ្លូវ ដើម្បីងាយស្រួលធ្វើចរាចរ។
ដើមឈើដែលដុះក្នុងតំបន់ទេសចរណ៍អង្គរ ក្រៅពីផ្ដល់ម្លប់ត្រជាក់ដល់ទេសចរ និងលើកសោភ័ណភាពទីរមណីដ្ឋានបុរាណនេះ វាក៏ទាក់ទាញភ្ញៀវទេសចរឲ្យចាប់អារម្មណ៍តំបន់ទេសចរណ៍មួយនេះផងដែរ ក៏ប៉ុន្ដែជារឿយៗត្រូវបានរងការកាប់បំផ្លាញជាបន្ដបន្ទាប់ ក្រោមលេសអភិវឌ្ឍន៏ផ្លូវ ៕
ពលរដ្ឋ នៅសៀមរាប ប្រតិកម្មនឹងអាជ្ញាធរកាប់ដើមឈើ ក្នុងតំបន់ទេសចរណ៍
ប្រភព និង អត្ថបទ ដោយ : បូ សាវី (VOD)
