អនុប្រធានគណបក្សសង្គ្រោះជាតិ លោក កឹម សុខា ព្រមានថា បាតុកម្មទ្រង់ទ្រាយធំ ដើម្បីស្វែងរកយុត្តិធម៌ជូនម្ចាស់បោះឆ្នោត នឹងផ្ទុះឡើងថ្មីទៀត បើជំនួបចរចា នៅតែមិនអាចរកច្រកចេញរួច។
ការថ្លែងបែបនេះ របស់លោក កឹម សុខា អនុប្រធានគណបក្សសង្គ្រោះជាតិ ធ្វើឡើងនៅស្នាក់ការកណ្តាលរបស់គណបក្សសង្គ្រោះជាតិ នៅសង្កាត់ចក្រអង្រែលើ រាជធានីភ្នំពេញ នាថ្ងៃសៅរ៍នេះ។ លោក កឹម សុខា អះអាងថា នៅពេលនេះ សហគមន៍អន្តរជាតិកំពុងជំរុញឲ្យប្រទេសកម្ពុជា គោរពសិទ្ធិមនុស្ស និងសេរីភាពបញ្ចេញមតិឡើងវិញ បន្ទាប់ពីរដ្ឋាភិបាលរិតបន្តឹងសេរីភាពជួបជុំ ។
លោក កឹម សុខា បន្តថា នៅពេលណាស្ថានការណ៍វិលមករកភាពប្រក្រតីវិញនោះ មហាបាតុកម្ម នឹងផ្ទុះឡើងម្តងទៀត បើភាពជាប់គាំងនយោបាយនៅតែអូសបន្លាយ មិនអាចរកច្រកចេញរួច។
គណបក្សប្រជាជនកម្ពុជា ដែលដឹកនាំដោយលោកនាយករដ្ឋមន្ត្រី ហ៊ុន សែន ធ្លាប់អះអាងថា ការដាក់បំរាមជួបជុំមួយរយៈ គឺដើម្បីទប់ស្កាត់ភាពចលាចលក្នុងសង្គម ខណៈបក្សប្រឆាំងដឹកនាំធ្វើបាតុកម្ម ប្រកាសច្រានចោលលទ្ធផលបោះឆ្នោត ។
ទោះជាយ៉ាងណា គណបក្សទាំងពីរកំពុងឈានទៅរកតុចរចា ដើម្បីរកដំណោះស្រាយ បន្ទាប់ពីបង្ហាញសាច់ដុំដាក់គ្នារៀងៗខ្លួន ដែលម្ខាងមានកម្លាំងពលរដ្ឋគាំទ្រ និងម្ខាងទៀតមានកម្លាំងប្រដាប់អាវុធប្រកាសការពារ៕
