ក្រុមអាវក្រហមចង់ឲ្យ លោកស្រី យីង ឡាក់
បើកកិច្ចប្រជុំគណៈរដ្ឋមន្ដ្រីនៅ ខេត្តឈាងម៉ៃ
ប្រសិនបើលោកស្រីមិនមានលទ្ធភាពកោះប្រជុំ គណៈរដ្ឋមន្ដ្រីរបស់ខ្លួន
នៅទីក្រុង បាងកក ព្រោះតែបាតុករប្រឆាំងរដ្ឋាភិបាលឡោមព័ន្ធវិមាន
រដ្ឋាភិបាល និងតាមអុកឡុកលោកស្រីយ៉ាងខ្លាំងនោះ។
មេដឹកនាំអាវក្រហម នៅភាគខាងជើងប្រទេស គឺលោក
ពេជ្រឆាវ៉ាតវ៉ាន់តា ណាពុងសេរីកុល
បានប្រាប់កាសែតបាងកកប៉ុស្ដិ៍ថាក្រុមអាវក្រហមបានត្រៀមកំលាំងពី
៥០០០ ទៅ ៦០០០ នាក់ដើម្បីការពារសន្ដិសុខ
សំរាប់កិច្ចប្រជុំគណៈរដ្ឋមន្ដ្រីរបស់លោកស្រីយីងឡាក់។
លោកបានព្រមានថា
ប្រសិនបើកិច្ចប្រជុំនោះត្រូវបានអុកឡុកដោយពួកប្រឆាំងរដ្ឋាភិបាល
គឺជាអំពើខុសច្បាប់ និងជាការបំផ្លាញលទ្ធិប្រជាធិបតេយ្យ។
ក្រុមអាវក្រហមទាមទារឲ្យ លោកស្រី យីងឡាក់មកបើកសម័យប្រជុំ
គណៈរដ្ឋមន្ដ្រីរបស់ខ្លួន នៅខេត្តឈាងមៃ
ព្រោះពួកគេចោទថាទីក្រុងបាងកក
លែងក្លាយជាតំបន់សុវត្ថិភាពសំរាប់អ្នករាជការ
ហើយចាប់ពីពេលនេះតទៅ។
ប៉ុន្ដែសំណើរបស់ក្រុមអាវក្រហម មកដល់ពេលនេះ
មិនទាន់មានការឆ្លើយតបពី លោកស្រី យីង ឡាក់ ឡើយ។
តំបន់ភាគខាងជើងខេត្តឈាងម៉ៃ និងខេត្តឈាងរៃ
គឺជាមូលដ្ឋានរឹងមាំរបស់លោកស្រី យីង ឡាក់ និងលោក ថាក់ ស៊ីន
ហើយនៅតំបន់នេះគណបក្សភឿថៃរបស់លោកស្រីយីងឡាក់
បានឈ្នះឆ្នោតយ៉ាងលើសលប់
ទៅលើគណៈបក្សប្រឆាំងនៅគ្រប់ដំណាក់កាលបោះឆ្នោតទាំងអស់ក្នុងប្រទេស
ថៃ។
ប៉ុន្ដែអ្នកវិភាគព្រមានថា ប្រសិនបើលោកស្រី យីង ឡាក់
សំរេចកោះប្រជុំគណៈរដ្ឋមន្ដ្រីនៅខេត្តឈាងម៉ៃ
ទៅតាមការទាមទាររបស់ក្រុមអាវក្រហមមែននោះ
អាចជាទង្វើខុសច្បាប់ព្រោះរាជធានីបាងកក
គឺជារដ្ឋាភិបាលកណ្ដាលរបស់ប្រទេស៕
