ការចាប់ឆ្នោតបែងចែកពូលសម្រាប់វគ្គជម្រុះពានរង្វាន់ទ្វីបអឺរ៉ុប UEFA EURO 2016 បានចេញជាលទ្ធផលហើយ។ ក្រុមជម្រើសជាតិនៃប្រទេសអឺរ៉ុបទាំង៥៣ ត្រូវបានបែងចេញជា៩ពូល ដែលក្នុងនោះ៨ពូលមានមាន៦ក្រុមដូចគ្នា ខណៈ១ពូលចុងក្រោយមាន៥ក្រុម។
លទ្ធផលនៃការចាប់ឆ្នោតនេះ បានបង្ហាញឲ្យដឹងថា ក្រុមជើងឯកចាស់ អេស្ប៉ាញ ស្ថិតនៅក្នុងពូល C ជាមួយ អ៊ុយក្រែន, ស្លូវ៉ាគី, បេឡារូស, ម៉ាសេដូនៀ និងលុចហ្សំបួរ ខណៈក្រុមរងជើងឯកចាស់ អ៊ីតាលី ស្ថិតក្នុងពូល H ជាមួយក្រូអាត, ន័រវែស, ប៊ុលហ្គារី, អាហ្សេបៃហ្សង់ និងម៉ាល់តា។ ចំណែកក្រុមបារាំង មិនចាំបាច់ចាប់ឆ្នោតនោះទេ ដោយសារអាចជាប់ទៅប្រកួតជុំផ្ដាច់ព្រ័ត្រជាស្វ័យប្រវត្តិដោយមិនបាច់ជម្រុះ ក្នុងនាមជាម្ចាស់ផ្ទះ។
ការប្រកួតលើកនេះ គឺខុសប្លែកពីលើកមុនៗ ដោយសារក្រុមដែលត្រូវជាប់ទៅជុំផ្ដាច់ព្រ័ត្រ បានកើនដល់២៤ក្រុម មិនមែន១៦ដូចរាល់ដងនោះទេ។ ដូច្នេះក្នុងចំណោមក្រុមទាំង៥៣ដែលត្រូវប្រកួតជម្រុះ នឹងមាន២៣ក្រុមត្រូវជាប់ទៅបន្ថែមជាមួយម្ចាស់ផ្ទះបារាំង។
តោះ! កុំចាំយូរ សាកមើលតារាងលទ្ធផលនៃការចាប់ពូលទាំង៩ ដូចខាងក្រោមនេះមើល៍ ថាតើពូលណាដែលប្រិយមិត្តគិតថាជាពូលមរណៈ ឬជាពូលតានតឹងជាងគេ?
| A | B | C |
| ហុល្លង់ សាធារណរដ្ឋឆេក ទួរគី ឡាតវី អ៊ីស្លង់ កាហ្សាក់ស្ថាន | បូស្នី-ហឺហ្ស៊េហ្គោវីណា បែលហ្សិក អ៊ីស្រាអែល វែល ស៊ីប្រ៊ូស អង់ដូរ៉ា | អេស្ប៉ាញ អ៊ុយក្រែន ស្លូវ៉ាគី បេឡារូស ម៉ាសេដូនី លុចហ្សំបួរ |
| D | E | F |
| អាល្លឺម៉ង់ អៀរឡង់ ប៉ូឡូញ ស្កុតឡែន ហ្សកហ្ស៊ី ហ្គីប្រាល់តា | អង់គ្លេស ស្វីស ស្លូវើនៀ អេស្តូនី លីទុយអានី សាន់ម៉ារីណូ | ក្រិក ហុងគ្រី រ៉ូម៉ានី ហ្វាំងឡង់ អៀរឡង់ខាងជើង ហ្វារ៉ូអាយឡែន |
| G | H | I |
| រុស្សី ស៊ុយអែត អូទ្រីស ម៉ុងតេណេក្រូ ម៉ុលដូវ៉ា លិចធិនស្តែន | អ៊ីតាលី ក្រូអាត ន័រវែស ប៊ុលហ្គារី អាហ្សេបៃហ្សង់ ម៉ាល់តា | ព័រទុយហ្គាល់ ដាណឺម៉ាក ស៊ែប អាមិននៀ អាល់បានី |
ការប្រកួតវគ្គជម្រុះនេះ នឹងចាប់ផ្ដើមនៅខែកញ្ញា ឆ្នាំ២០១៤ខាងមុខនេះហើយ។ ក្រុមលេខ១ និងលេខ២ នៃពូលនីមួយៗនឹងត្រូវជាប់ទៅជុំផ្ដាច់ព្រ័ត្រជាស្វ័យប្រវត្តិជាមួយក្រុមលេខ៣ល្អបំផុត១ក្រុមទៀត (សរុប១៩ក្រុម)។ ចំណែកក្រុមលេខ៣ដែលនៅសល់៨ក្រុមទៀត នឹងត្រូវប្រកួត play-off ២ជើង ដើម្បីរកក្រុមដែលឈ្នះ៤ក្រុមផ្សេងទៀត ទៅបន្ថែមលើក្រុមទាំង១៩ដែលបានជាប់ស្វ័យប្រវត្តិ៕
ដោយ៖ សុខ សុវត្ថិ (Sabay)
