តំណាងសហជីពធំៗចំនួន ១៨ បញ្ជាក់ជំហរជាថ្មីថា នឹងធ្វើបាតុកម្មនៅថ្ងៃទី៨ ខែមិនា នៅទីលានប្រជាធិបតេយ្យ តាមការគ្រោងទុក ទាមទារឲ្យរដ្ឋាភិបាលដោះលែងអ្នកជាប់ឃុំ២១នាក់ និងដំឡើងប្រាក់ឈ្នួលគោល១៦០ដុល្លារក្នុង១ខែ ទោះបីសាលារាជធានីភ្នំពេញមិនអនុញ្ញាតិ។
ក្នុងពេលវេទិកាលើកនេះ សហជីព នឹងអញ្ជើញលោកស ខេង រដ្ឋមន្ត្រីក្រសួងមហាផ្ទៃ លោកឧបនាយករដ្ឋមន្ត្រី គាត ឈន់ លោកអ៊ិត សំហេង រដ្ឋមន្ត្រីក្រសួងការងារ និងលោក ជីវ កេង ប្រធានសាលាដំបូងរាជធានីភ្នំពេញដើម្បីឆ្លើយបំភ្លឺនៅមុខកម្មករ។
ប៉ុន្តែ នៅព្រឹកថ្ងៃអង្គារនេះ សាលារាជធានីភ្នំពេញ បានបដិសេធសំណើររបស់សហជីពទាំងនោះ ហើយទុកឲ្យក្រសួងមហាផ្ទៃជាអ្នកសម្រេច។ ប្រធានសហភាពសហជីពកម្ពុជា លោក រ៉ុង ឈុន មានប្រសាសន៍ថា ការបដិសេធមិនឲ្យសហជីពធ្វើបាតុកម្មនេះ គ្រាន់តែជាលេសរបស់សាលារាជធានីភ្នំពេញប៉ុណ្ណោះ។
លោក បន្តថា តាមច្បាប់ស្តីពីបាតុកម្មត្រង់ជំពូក២ ឲ្យដឹងថា រាល់ការប្រមូលផ្តុំ ពិភាក្សា និងបញ្ចេញមតិគឺជាសិទ្ធរបស់ប្រជាពលរដ្ឋ ហើយគ្រាន់តែជូនដំណឹងទៅអាជ្ញាធរបានហើយ មិនចាំបាច់សុំការអនុញ្ញាតទេ។
ទោះជាយ៉ាងណា អ្នកនាំពាក្យក្រសួងមហាផ្ទៃលោក ខៀវ សុភ័គ មានប្រសាសន៍ថា លោក មិនទាន់បានទទួលលិខិតរបស់សហជីពនៅឡើយទេ។ ប៉ុន្តែ លោក បន្តថា ប្រសិនបើវេទិកាសាធារណៈនោះ មានឆន្ទៈពិតប្រាកដ និង មិនពាក់ព័ន្ធនយោបាយ ក្រសួង នឹងអនុញ្ញាតិ។
ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជាលោក ស ម៉ូរ៉ា មានប្រសាសន៍ថា តាមការគ្រោងទុកនឹងមានកម្មករចូលរូមធ្វើបាតុកម្មនៅទីលានប្រជាធិបតេយ្យ ច្រើនជាងមួយម៉ឺននាក់ ដូចនេះតំណាងសហជីពមិនអាចលុបចោលគម្រោងនេះបានទេ។
ក្រុមមេដឹកនាំសហជីព ព្រមានថាបើវេទិកានៅថ្ងៃទី៨ខែមិនា នោះនៅតែមិនទាន់មានដំណោះស្រាយ តាមការទាមទារ ប្រាក់ឈ្នួល១៦០ដុល្លារ និងដោះលែងអ្នកជាប់ជនទាំង២៣នាក់ទេ កម្មករនៅគ្រប់វិស័យ នឹងធ្វើកូដកម្មទ្រង់ទ្រាយធំនៅទូទាំងប្រទេស ចាប់ពីថ្ងៃទី១២ដល់ថ្ងៃទី១៥ ខែមិនា ហើយមន្ត្រីរាជការ មិនទៅធ្វើការ។ ចំណែកថ្ងៃទី១៦ដល់ថ្ងៃទី១៩ ខែមិនា កម្មករនិយោជិតនឹងទៅកន្លែងធ្វើការ តែមិនបំពេញការងារ៕
សហជីពធំៗ ប្រកាន់ជំហរធ្វើបាតុកម្មនៅថ្ងៃទី ៨ មិនា ទោះបីសាលារាជធានីភ្នំពេញមិនអនុញ្ញាត
ប្រភព និង អត្ថបទ ដោយ ឡាយ សាមាន (VOD)
