កាលពីខែកញ្ញា ឆ្នាំ២០១៣ របាយការណ៍ផ្ញើទៅកាន់ផ្សារហ៊ុនរបស់ម៉ាឡេស៊ី ឲ្យដឹងថា ក្រុមហ៊ុនលក់រាយ Parkson Holdings Bhd ដែលមានមូលដ្ឋាននៅប្រទេសម៉ាឡេស៊ី នឹងសាងសង់អគារមានកម្ពស់ ៧ ជាន់នៅទល់មុខអាកាសយានដ្ឋានអន្តរជាតិភ្នំពេញ ដែលមានបម្រើសេវាផ្សារទំនើប កន្លែងលេងប៊ូលីង ហាងលក់រាយ កន្លែងហាត់ប្រាណ ហាងដាក់តាំងលក់ បន្ទប់ច្រៀងខារ៉ាអូខេ និងកន្លែងហែលទឹក។ ប៉ុន្តែ គម្រោងមួយនេះ ត្រូវបានផ្លាស់ប្តូរមកសាងសង់នៅតំបន់បឹងកក់១វិញ ដែលសំណង់កំពុងតែដំណើរការ។
សន្តិសុខម្នាក់ ធ្វើការនៅសំអាងការមួយនៅម្តុំនេះ លោក ឃឹម លីស្រ៊ាង អាយុ២៦ឆ្នាំ ឲ្យដឹងថា សំណង់ដែលកំពុងសាងសង់នោះ គឺជាសំណង់ផ្សារទំនើប Parkson ដែលបានបុកគ្រឹះសង់ជាង១ឆ្នាំហើយ តែបដាសម្គាល់Parkson ទើបលើកឡើងបិទលើជញ្ជាំង កាលពីថ្ងៃចន្ទតែប៉ុណ្ណោះ។
លោក ផន អ្នករត់រ៉ឺម៉ក់កង់បី ដែលធ្លាប់រស់នៅតំបន់នោះ ឲ្យដឹងថា ទីតាំងអគារនោះ និងតំបន់ជុំវិញ ពីមុនជាបឹងមួយ ដែលពលរដ្ឋរាប់រយគ្រួសារ បានចាក់ដីរស់នៅ តែពួកគេ បានចាកចេញទៅប្រមាណជាង១០ឆ្នាំមកហើយ បន្ទាប់ពីទទួលបានសំណង។
VOD មិនទាន់អាចទាក់ទងក្រុមហ៊ុន Parkson ដើម្បីអត្ថាធិប្បាយលើបញ្ហានេះបាននៅឡើយទេ។
នៅខាងក្រោយផ្សារទំនើបParksonនោះ មានការសាង់សង់អគារ ២០ជាន់មួយទៀត បែបសណ្ឋាគារ។ មេកាសំណង់នៅការដ្ឋាននោះ ឲ្យដឹងថា អគារ២០ជាន់នោះ កំពុងត្រូវបានស្ថាបនាដោយក្រុមហ៊ុនចិន។
ផ្សារទំនើប Parkson ត្រូវបានគេរំពឹងថានឹងបើកដំណើរការនៅខែ មិថុនា ឆ្នាំ ២០១៧ ខាងមុខ។ចំណែក ផ្សារទំនើបអ៊ីអនរបស់ជប៉ុន គ្រោងនឹងបើកដំណើរការនៅពាក់កណ្ដាលឆ្នាំ ២០១៤។
ក្រុមហ៊ុន Parkson បានដំណើរការហាងធំៗចំនួន ៥២ នៅក្នុងប្រទេស ម៉ាឡេស៊ី វៀតណាម និង ឥណ្ឌូនេស៊ី៕
អត្ថបទដោយ ៖ តាំង វីដា និងស៊ុន ណារិន (VOD)
