លោក លី ស្រៀខេង ប្រជាពលរដ្ឋម្នាក់ ក្នុងចំណោមប្រជាពលរដ្ឋ ៣គ្រួសារ ដែលមានជម្លោះដីធ្លីជាមួយក្រុមហ៊ុន ឃុន សៀ ដែលត្រូវជនល្មើសវាយក្បាលនឹងញញួរកាលពីព្រឹកមិញ បានរៀបរាប់ប្រវត្តិទំនាស់របស់លោកថា ពីរថ្ងៃមុន មានមនុស្សមករំខានការរកស៊ីលក់ដូររបស់គ្រួសារគាត់ ដោយចោទថា គាត់លក់ដូរនៅលើដីរបស់គេ។ លោកបន្ថែមថា ស្រាប់តែព្រឹកមិញ មានមនុស្សជិះម៉ូតូតាមវាយលោកពីក្រោយតែម្ដង។
លោក លី ស្រៀខេង មានប្រសាសន៍បន្ថែមថា ការរស់នៅរបស់ពួកគាត់រងនូវការគំរាមកំហែង ហើយលោករស់ដោយការភ័យខ្លាចជារៀងរាល់ថ្ងៃ។
អធិការប៉ូលីសខណ្ឌទួលគោក លោកហួត ចាន់យ៉ារ៉ាន់ មានប្រសាសន៍យ៉ាងខ្លីប្រាប់ VOD លោកកំពុងតែស្រាវជ្រាវករណីនោះ។
មន្ត្រីផ្នែកច្បាប់នៃលេខាធិការដ្ឋានសិទ្ធិលំនៅដ្ឋាន លោក ណន អូនី មានប្រសាសន៍ថា ករណីវាយជនរងគ្រោះ ដែលមានទំនាស់ដីធ្លី នៅតំបន់បឹងកក់ មិនមែនជាករណីទី១ទេ ហើយអាជ្ញាធរក៏មិនដែលវែកមុខរកជនល្មើសឃើញដែរ។ លោកជំរុញឲ្យអាជ្ញាធរមូលដ្ឋាន និងតុលាការ បង្កើនល្បឿនរកយុត្តិធម៌ជូនជនរងគ្រោះ ដែលកំពុងរងនូវការគំរាមកំហែង។
កាលពីខែវិច្ឆិកា ឆ្នាំ២០១៣ គ្រួសារលោកលី ស្រៀខេង ធ្លាប់បានចោទក្រុមហ៊ុន ឃុន សៀ ថាបានព្រលែងពស់វែកចំនួន៤ក្បាលចូលផ្ទះគាត់ កាលពីយប់ថ្ងៃទី៣០ ខែតុលា ឆ្នាំ២០១៣ និងធ្លាប់គំរាមបោកគ្រាប់បែកចូលផ្ទះគាត់ផងដែរ។
ទំនាស់ដីធ្លីរវាងពលរដ្ឋ៣គ្រួសារនៅតំបន់បឹងកក់១ ជាមួយនឹងក្រុមហ៊ុន កើតឡើងតាំងពីខែមេសា ឆ្នាំ២០១៣ ដោយពលរដ្ឋអះអាងថា ក្រុមហ៊ុន ឃុន សៀ បានព្យាយាមទិញយកដីពលរដ្ឋនៅទីនោះចំនួន៣គ្រួសារ ដោយឲ្យតម្លៃ ១៥០០០ដុល្លារក្នុងមួយគ្រួសារ។ ប៉ុន្តែ ប្រជាពលរដ្ឋមិនព្រមលក់ ហើយក្រោយមកក្រុមហ៊ុន ក៏ព្យាយាមរកគ្រប់មធ្យោបាយដើម្បីរំខានដល់ពួកគាត់៕
ប្រភព និង អត្ថបទ ដោយ ណុល ដារ៉ា (VOD)
