យន្តហោះម៉ាឡេស៊ី ដែលបាត់ការទាក់ទង នៅលើដែនអាកាស ត្រូវបានមន្ត្រីកងទ័ពជើងទឹកវៀតណាម អះអាងថា ធ្លាក់ចូលក្នុងដែនទឹកសមុទ្រចិនខាងត្បូង ដែលមានចម្ងាយជិត ២៥០គីឡូម៉ែត្រពីកោះត្រល់។
ទីភ្នាក់ងារសារព័ត៌មាន Reuters បានស្រង់សម្តីមេបញ្ជាការកងទ័ពជើងទឹកវៀតណាម លោក Ngo Van Phat មកចុះផ្សាយថា យន្តហោះម៉ាឡេស៊ី ប្រភេទ Boeing 777 ដែលដឹកអ្នកដំណើរ ២២៧នាក់ និងអ្នកបម្រើលើយន្តហោះ ១២នាក់ (សរុប ២៣៩នាក់) ចេញពីទីក្រុងកូឡាឡាំពួ ប្រទេសម៉ាឡេស៊ី ទៅកាន់ទីក្រុងប៉េកាំង ប្រទេសចិន ត្រូវបានរកឃើញថា បានធ្លាក់ក្នុងសមុទ្រចិនខាងត្បូង ដែលស្ថិតនៅចម្ងាយប្រមាណ ២៤៦គីឡូម៉ែត្រ ភាគខាងត្បូងកោះ PhuQuoc ឬកោះត្រល់។ លោក Ngo Van Phat បន្តថា ខណៈនេះអាជ្ញាធរជើងទឹកវៀតណាម ម៉ាឡេស៊ី និងចិន កំពុងសហការគ្នា ស្វែងរកយន្តហោះនេះ។
មន្ត្រីធ្វើការនៅជើងហោះហើរម៉ាឡេស៊ី និយាយថា ក្នុងចំណោមអ្នកដំណើរទាំង ២២៧នាក់ ក្នុងនោះយ៉ាងហោចណាស់ មានជនជាតិចិន ១៥២នាក់ ជនជាតិម៉ាឡេស៊ី ៣៨នាក់ ជនជាតិឥណ្ឌូនេស៊ី ១២នាក់ អូស្ត្រាលី ៦នាក់ និងជនជាតិអាមេរិក ៣នាក់ ព្រមទាំងកុមារជនជាតិចិន និងអាមេរិកផងដែរ។
បើតាមសេចក្តីរាយការណ៍នានា បានឲ្យដឹងថា យន្តហោះម៉ាឡេស៊ីនេះ បានបាត់ចេញពីប្រព័ន្ធទំនាក់ទំនង នៅពេលដែលហោះចូលដែនអាកាសប្រទេសវៀតណាម កាលពីព្រលឹមថ្ងៃសៅរ៍នេះ៕
ប្រែសម្រួលដោយ៖ ពេជ្រ សុធារី (VOD)
