ប្រមុខរាជរដ្ឋាភិបាលកម្ពុជា ឲ្យដឹងថា សេចក្តីព្រាងច្បាប់ចំនួន៣ ដែលពាក់ព័ន្ធនឹងការអនុវត្តក្នុងប្រព័ន្ធតុលាការ រួមមាន សេចក្តីព្រាងច្បាប់ស្តីពីការរៀបចំ និងការប្រព្រឹត្តទៅនៃតុលាការ សេចក្តីព្រាងច្បាប់ ស្តីពី ការបង្កើតឧត្តមក្រុមប្រឹក្សាអង្គចៅក្រម និងសេចក្តីព្រាងច្បាប់ ស្តីពីលក្ខន្តិក្កៈចៅក្រម នឹងត្រូវអនុម័តឲ្យប្រើប្រាស់ក្នុងឆមាសទី១ នៃឆ្នាំ២០១៤នេះ។
ក្នុងវេទិការាជរដ្ឋាភិបាល និងវិស័យឯកជន លើកទី១៧ នៅវិមានសន្តិភាព នាព្រឹកថ្ងៃអង្គារនេះ លោក នាយករដ្ឋមន្ត្រី ហ៊ុន សែន បានថ្លែងថា សេចក្តីព្រាងច្បាប់ចំនួន ៣ ដែលធានាដល់ឯករាជ្យភាពរបស់តុលាការ នឹងត្រូវអនុម័ត ដាក់ឲ្យប្រើប្រាស់ ក្នុងឆមាសទី១ ក្នុងឆ្នាំ២០១៤នេះ រួមមាន សេចក្តីព្រាងច្បាប់ស្តីពីការរៀបចំ និងការប្រព្រឹត្តទៅនៃតុលាការ សេចក្តីព្រាងច្បាប់ស្តីពីការបង្កើតឧត្តមក្រុមប្រឹក្សាអង្គចៅក្រម និងសេចក្តីព្រាងច្បាប់ស្តីពីលក្ខន្តិក្កៈចៅក្រម។ លោកបានបន្ថែមថា សេចក្តីព្រាងច្បាប់ទាំង៣នោះ បានប្រជុំឆ្លងអន្តរក្រសួងរួចហើយ និងកំពុងស្ថិតក្នុងដៃឧបនាយករដ្ឋមន្ត្រី ដែលទទួលបន្ទុកពិនិត្យលើសេចក្តីព្រាងច្បាប់ទាំងនោះ មុននឹងបញ្ជូនទៅកាន់អង្គប្រជុំគណៈរដ្ឋមន្ត្រីធ្វើការអនុម័ត។
ប្រធានផ្នែកស៊ើបអង្កេតនៃសមាគមសិទ្ធិមនុស្សអាដហុក លោក នី ចរិយា យល់ថា ច្បាប់ទាំង៣នេះមានសារៈសំខាន់ណាស់សម្រាប់ការអនុវត្តក្នុងតុលាការ ហើយលោកក៏មានការភ្ញាក់ផ្អើលណាស់ដែរដែលសភានឹងអនុម័តឲ្យប្រើប្រាស់ក្នុងពេលឆាប់ៗ ដែលកន្លងមកសង្គមស៊ីវិលតែងស្នើឲ្យមានការអនុម័តច្បាប់នេះឡើង តែតែងត្រូវបានទាត់ចោលដោយរដ្ឋាភិបាល។ លោកបន្ថែមដោយសង្ឃឹមថា ខ្លឹមសាររបស់ច្បាប់នេះនឹងធ្វើឲ្យតុលាការឯករាជ្យ និងមិនដាក់សម្ពាធដល់តុលាការឡើយ។
ប្រធានក្រុមអ្នកច្បាប់ការពារសិទ្ធិកម្ពុជា លោក សុក សំអឿន បានឲ្យដឹងថា លោកនៅមិនទាន់ដឹងពីខ្លឹមសារនៃសេចក្តីព្រាងច្បាប់ទាំងបីនេះនៅឡើយទេ ខណៈដែលច្បាប់នេះ កំពុងឋិតនៅក្នុងដៃសភានៅឡើយ ប៉ុន្តែបើខ្លឹមសារនៃច្បាប់ទាំងនេះ អាចបំពេញតម្រូវការរបស់ប្រជាពលរដ្ឋដែលកំពុងត្រូវការក្នុងពេលបច្ចុប្បន្ន នោះជាការល្អ។ លោកបន្ថែមថា រដ្ឋាភិបាលគួរតែស្នើឲ្យមានការចូលរួមអនុម័តពីអ្នកដែលឯករាជ្យ ក៏ដូចជាអ្នកដែលមានជំនាញពិតប្រាកដ ដើម្បីឲ្យច្បាប់នោះកាន់តែមានភាបរឹងមាំថែមទៀត។
VOD មិនអាចទាក់ទងសុំការអធិប្បាយលម្អិតពាក់ព័ន្ធសេចក្តីព្រាងច្បាប់នេះ ពីប្រធានគណៈកម្មការហិរញ្ញវត្ថុ ធនាគារ និង សវនកម្មនៃរដ្ឋសភា លោក ជាម យៀម បានទេ នៅថ្ងៃអង្គារនេះ។
កន្លងមក ប្រជាពលរដ្ឋ ក៏ដូចជាសង្គមស៊ីវិល ធ្លាប់បានរិះគន់ពាក់ព័ន្ធទៅនឹងការអនុវត្តច្បាប់របស់តុលាការកម្ពុជា ថាមិនមានភាពឯករាជ្យ ហើយតែងតែមានគំនាបពីអ្នកមានអំណាច ជាហេតុធ្វើឲ្យមានភាពអយុត្តិធម៌សម្រាប់អ្នកក្រីក្រ និងទន់ខ្សោយ៕
អត្តបទដោយ ៖ កាន់ វិច្ឆិកា (VOD)
