ភាគីកម្ពុជា និងសហគមន៍អឺរ៉ុបប្រចាំនៅកម្ពុជា បានជួបពិភាក្សាគ្នាកាលពីថ្ងៃទី០៥ខែមីនា ដើម្បីដោះស្រាយបញ្ហាដីសម្បទានសេដ្ឋកិច្ចសម្រាប់ដាំដុះអំពៅ និងការចម្រាញ់ស្ករអំពៅ ដោយឈានទៅរកដំណោះស្រាយនៅពេលឆាប់ៗនេះ។
គេហទំព័ររបស់ក្រសួងពាណិជ្ជកម្ម ឲ្យដឹងថា ឯកអគ្គរដ្ឋទូតរបស់សហគមន៍អឺរ៉ុបប្រចាំនៅកម្ពុជា លោក Jean Francois Cautain ត្រូវបានអញ្ជើញឲ្យចូលរួមក្នុងកិច្ចប្រជុំលើកទី២របស់ក្រុមការងារជាន់ខ្ពស់ ដើម្បីដោះស្រាយលើការចោទប្រកាន់អំពីការរំលោភលើដីសម្បទានសេដ្ឋកិច្ចសម្រាប់ដាំដុះអំពៅ និងការចម្រាញ់ស្ករអំពៅ។គេហទំព័របន្តថា តំណាងជាន់ខ្ពស់នៃក្រុមហ៊ុនដាំដុះអំពៅ ក្រសួងពាក់ព័ន្ធ និងសមត្ថកិច្ចមូលដ្ឋាន បានចូលរួមពិភាក្សាផ្លាស់ប្តូរយោបល់ ប្រកបដោយវិជ្ជមាន និងក្នុងអត្ថន័យស្ថាបនា ដើម្បីស្វែងរកដំណស្រាយ។
អ្នកចូលរួមទាំងអស់គ្នានៃកិច្ចបិភាក្សានេះ បានដឹងថា នៅមានភាពខុសគ្នានៅឡើយចំពោះចំនួន និងប្រភេទនៃពាក្យបណ្តឹងដែលនៅមិនទាន់ដោះស្រាយ។ អ្នកចូលរួមតទាំងអស់ បានពិភាក្សាយ៉ាងល្អិតល្អន់ ទៅលើវិសាលភាព និងវិធីសាស្ត្រនៃការវាយតម្លៃ ពីខាងក្រៅដែលអាចធ្វើទៅបានមុននឹងកំណត់ពីចំណាត់ការក្នុងការទូទាត់សំណង ក្នុងករណីចំបាច់ ដើម្បីដោះស្រាយចំពោះវិវាទដែលនៅសេសសល់។
ក្រសួងពាណិជ្ជកម្ម បញ្ជាក់ថា «យើងអាចកំណត់បានថា កិច្ចប្រជុំពិភាក្សានេះ ជាជំហានវិជ្ជមានឈានឆ្ពោះទៅមុខ ដើម្បីស្វែងរកដំណោះស្រាយច្បាស់ ដែលអាចបំពេញចិត្តភាគី ដែលពាក់ព័ន្ធទាំងអស់បាន»។
កាលពីថ្ងៃទី១០ខែកុម្ភៈ កិច្ចប្រជុំគណៈកម្មការធិការពិសេស ដើម្បីរកដំណោះស្រាយរឿងស្ករអំពៅ ដោយមានការចូលរួមពី លោក ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម លោក អ៊ុក រ៉ាប៊ុន រដ្ឋមន្ត្រីក្រសួងកសិកម្ម រុក្ខប្រមាញ់ និងនេសាទ លោក សាយ សំអាល់ រដ្ឋមន្ត្រីក្រសួងបរិស្ថាន ឯកអគ្គ- រដ្ឋទូតសហភាពអឺរ៉ុបប្រចាំនៅកម្ពុជា និងតំណាងមកពីក្រសួងការបរទេស ក្រសួងដែនដី នគរូបនីកម្ម និងសំណង់ អភិបាល និងអភិបាលរង ខេត្តកោះកុង កំពង់ស្ពឺ កំពង់ធំ ព្រះវិហារ ឧត្តរមានជ័យ ក្រចេះ និងក្រុមហ៊ុនចម្រាញ់ស្ករអំពៅ។
អ្នកនាំពាក្យក្រសួងពាណិជ្ជកម្ម លោក កែន រដ្ឋា មានប្រសាសន៍ថា រដ្ឋាភិបាល មានឆន្ទៈក្នុងការដោះស្រាយជូនប្រជាពលរដ្ឋ តាមរយៈការសិក្សាបន្តនៃផលប៉ះពាល់ ដោយសារកន្លងមក របាយការណ៍នៃផល ប៉ះពាល់ មានភាពខុសគ្នា។លោកបន្តថា រដ្ឋាភិបាល នឹងបង្កើតភាគីទីបី ដើម្បីចូលទៅសិក្សាពីផលប៉ះពាល់ «ពិនិត្យ និងមើលចំនួនក្រុមគ្រួសារដែល ទទួលរងផលប៉ះពាល់ ដែលបានដោះស្រាយហើយ នីតិវិធីដែលបានប្រើ និងចំនួនដែលឯកអគ្គរដ្ឋទូត សហគមន៍អឺរ៉ុបនោះ គាត់ទទួលបានពីប្រភពណាមួយ ដែលគាត់មានពីប្រភពណាមួយដែលគាត់មាន អញ្ចឹងយើងធ្វើការផ្ទៀតផ្ទាត់គ្នា ហើយពិនិត្យរាល់ឯកសារទាំងអស់នោះឡើងវិញ»។
នាយកប្រតិបត្តិអង្គការសមធម៌កម្ពុជា លោក អៀង វុទ្ធី មានប្រសាសន៍ថា អ្នកមានជម្លោះដីធ្លីនៅខេត្តកោះកុង មានប្រមាណ២០០គ្រួសារ ឧត្តរមានជ័យ ៦០០គ្រួសារ កំពង់ស្ពឺ ២០០គ្រួសារ និងថ្មីៗនេះ សហគមន៍មួយចំនួនទៀត ក៏បានស្នើសុំអន្តរាគមន៍។លោកបន្តថា រដ្ឋាភិបាល គួរតែផ្តល់ដីសមរម្យជូនប្រជាពលរដ្ឋ ដែលរងផលប៉ះពាល់ «សំខាន់ពួកគាត់ត្រូវការដីត្រឡប់មកវិញ ហើយយើងគិតថា ក្រុមហ៊ុនក៏ដូចជារដ្ឋាភិបាល អាចស្វែងរកដីដែល អាចដោះដូរជាមួយពួកគាត់វិញ ហើយយើងសិក្សាទៅ ធ្វើការពិភាក្សាគ្នា ថាតើពួកគាត់ប៉ះពាល់ដីប៉ុន្មាន ហើយយើងត្រូវកាត់ចេញប៉ុន្មាន ដើម្បីផ្តល់ឲ្យពួកគាត់វិញ»។
កាលពីចុងខែមករា ឆ្នាំ២០១៤ សមាជិកសភាអឺរ៉ុប១រូប បានជំរុញទៅថ្នាក់ដឹកនាំសហភាពអឺរ៉ុប(EU)ទាំងមូល ឲ្យដាក់សម្ពាធលើរដ្ឋាភិបាលកម្ពុជា ទទួលយកការស៊ើបអង្កេតករណីជម្លោះដីធ្លីរវាងប្រជាពលរដ្ឋក្នុងខេត្ត ចំនួន៣ និងក្រុមហ៊ុនស្ករអំពៅ របស់ឧកញ្ញា លី យ៉ុងផាត់។
VOD មិនអាចសុំការអត្ថាធិប្បាយជុំវិញករណីនេះ ពីលោកឧកញ្ញា លី យ៉ុងផាត់ ប្រធានក្រុមហ៊ុនកសិឧស្សាហកម្មស្ករអំពៅ បាននៅឡើយទេ។
លោក អៀង វុទ្ធី ឲ្យដឹងថា ជម្លោះដីធ្លីនៅខេត្តកោះកុង បានចាប់ផ្តើមតាំងពីឆ្នាំ២០០៦ នៅលើដីជាង១ពាន់ហិកតា និងជម្លោះនៅខេត្តកំពង់ស្ពឺ និងឧត្តរមានជ័យ កើតឡើងចាប់ពីឆ្នាំ២០១០ លើដីជាង១ពាន់ហិកតា៕
កម្ពុជា និងEU ឈានទៅរកដំណោះស្រាយរឿងដីសម្បទានសេដ្ឋកិច្ចសម្រាប់ដាំដុះអំពៅ
ប្រភព និង អត្ថបទ ដោយ : ស៊ុន ណារិន (VOD)
