លោក Nguyen Chi Vinh (ឆ្វេង) អនុរដ្ឋមន្ត្រីការពារជាតិវៀតណាម
(រូបថតពី៖ សារព័ត៌មាន Xinhua)
ចិនបានស្នើជាថ្មីទៀត ទៅរដ្ឋាភិបាលវៀតណាម កុំឲ្យយកករណីជម្លោះ ដែនសមុទ្រនៃប្រទេស ទាំងពីរ នៅ សមុទ្រចិនភាគខាងត្បូង ទៅកាន់តុលាការអន្តរជាតិ គឺទុកលទ្ធភាពដោះស្រាយ ជាទ្វេរភាគីនៃប្រទេសទាំងពីរ។អនុរដ្ឋមន្ត្រីការពារជាតិវៀតណាម លោក Nguyen Chi Vinh ថ្លែងនៅក្រៅកិច្ចប្រជុំមួយ នៅប្រទេសសិង្ហបុរីថា វៀតណាមនៅមិនទាន់ សម្រេចបញ្ចូនករណី ជម្លោះនៅដែនសមុទ្រភាគ ខាងត្បូងទៅតុលាការ អន្តរជាតិទេ គឺរង់ចាំមើលសកម្មភាពរបស់ចិនសិន។ លោកបញ្ជាក់ថា ចិនបានស្នើជាញឹកញាប់ កុំឲ្យវៀតណាមយកករណីជម្លោះដែនសមុទ្រនៃប្រទេសទាំងពីរកំពុងកើតមានទៅតុលាការអន្តរជាតិ។ នេះបើតាមសារព័ត៌មាន South China Morning Post។
អនុរដ្ឋមន្ត្រីការពារជាតិវៀតណាម បានបញ្ជាក់ទៀតថា ប្រសិនបើចិននៅតែដាក់សម្ពាធទៀតនោះ វៀតណាម នឹងមិនមានជម្រើសផ្សេង ក្រៅពីការស្វែងរកកិច្ចអន្តរាគមន៍ តាមរយៈ ច្បាប់អន្តរជាតិនោះទេ។
ជម្លោះដែនសមុទ្ររវាងចិន និងវៀតណាមនៅ សមុទ្រចិនខាងត្បូងត្រង់ ចំណុចកោះប៉ារ៉ាសែល បានកើតភាពតានតឹង ខ្លាំងជាថ្មីនៅដើមខែ ឧសភាកន្លងទៅនេះ នៅពេលដែលទីក្រុងប៉េកាំងចាប់ផ្តើមបូមយកប្រេងនៅកោះប៉ារ៉ាសែល កាលពីថ្ងៃទី២ខែឧសភា៕
ប្រភព ដោយ៖ VOD
